Koffee With Karan 9 : रश्मिकाने विजयला 100 वेळा काय विचारलं? लग्नाचं सिक्रेट समोर

रश्मिका मंदाना आणि विजय देवरकोंडा ही जोडी पहिल्यांदाच 'कॉफी विथ करण ९' शोमध्ये एकत्र दिसणार आहे. या दोघांनी त्यांच्या लग्नाची आतली गोष्ट चाहत्यांसोबत शेअर केली आहे. दोघांपैकी सर्वात आधी प्रपोज कोणी केलं?

रश्मिका मंदाना आणि विजय देवरकोंडा

रश्मिका मंदाना आणि विजय देवरकोंडा सध्या त्यांचं वैवाहिक जीवन एन्जॉय करत आहेत. ही जोडी आता करण जोहरच्या 'कॉफी विथ करण ९' या शोमध्ये एकत्र दिसणार आहे. या शोचा प्रोमो नुकताच रिलीज झालाय. यात दोघांनी त्यांच्या प्रेमाबद्दल आणि लग्नाबद्दल अनेक गोष्टी शेअर केल्या आहेत. याआधी विजयने 'कॉफी विथ करण ७' मध्ये अनन्या पांडेसोबत हजेरी लावली होती. तेव्हा ते 'लायगर' चित्रपटात एकत्र काम करत होते.

आधी प्रपोज कोणी केलं?

करण जोहरने प्रोमोमध्ये विचारलं की, 'तुमच्या दोघांपैकी आधी प्रपोज कोणी केलं?' यावर विजयने सांगितलं की रश्मिकानेच आधी लग्नासाठी विचारलं होतं. विजय मस्करीत म्हणाला, 'तू मला १०० वेळा विचारलंस, तेव्हा कुठे मी लग्नाला होकार दिला.' यावर करणने आश्चर्याने विचारलं, 'रश्मिका, तू खरंच १०० वेळा विचारलंस का?' तेव्हा रश्मिका हसत म्हणाली, 'मी त्याला वर्षभर हेच विचारत होते.'

ऑनस्क्रीन जोडी कोणासोबत छान दिसते?

रश्मिकाने या शोमध्ये तिच्या आवडत्या सहकलाकाराबद्दलही सांगितलं. रणबीर कपूर आणि अल्लू अर्जुन यापैकी एकाची निवड करायला सांगितल्यावर तिने अल्लू अर्जुनचं नाव घेतलं. त्यानंतर करणने विजयला विचारलं की, 'रश्मिकाला सोडून तुझी ऑनस्क्रीन जोडी कोणासोबत छान दिसते?' विजय काही बोलण्याआधीच रश्मिका म्हणाली, 'कोणासोबतच नाही.' यावर विजय हसत म्हणाला, 'बायकोच्या बोलण्याला होकार देणं हा लग्नाचा पहिला नियम आहे.' हे ऐकून रश्मिका जोरात हसू लागते.

२६ फेब्रुवारी २०२६ ला उदयपूरमध्ये झालं लग्न

रश्मिका आणि विजय यांचं लग्न २६ फेब्रुवारी २०२६ रोजी उदयपूरमध्ये पार पडलं होतं. त्यांच्या लग्नाचे फोटो आणि कपडे सोशल मीडियावर प्रचंड व्हायरल झाले होते. चाहत्यांमध्येही त्यांच्या लग्नाबद्दल खूप उत्सुकता होती.

अफवांना पूर्णविराम

'गीता गोविंदम' या चित्रपटामुळे या दोघांची ओळख अधिक घट्ट झाली. २०१७ मध्ये रिलीज झालेल्या या चित्रपटात दोघांनी एकत्र काम केलं होतं. त्यानंतर अनेक वर्ष त्यांच्या अफेअरच्या चर्चा रंगल्या होत्या. पण रश्मिका आणि विजयने त्यांच्या नात्याबद्दल कधीच उघडपणे भाष्य केलं नाही. अखेर दोघांनी साखरपुडा आणि लग्न करत सर्व अफवांना पूर्णविराम दिला.