Nisha Raphael POCSO Case: ११ वर्षांच्या मुलावर लैंगिक अत्याचार? इन्फ्लुएन्सर निशा राफेलवर पोक्सो अंतर्गत गुन्हा दाखल
सार
प्रसिद्ध सोशल मीडिया इन्फ्लुएन्सर निशा राफेलवर ११ वर्षांच्या मुलावर लैंगिक अत्याचार केल्याचा गंभीर आरोप आहे. या प्रकरणी तिच्यावर पोक्सो कायद्यांतर्गत गुन्हा दाखल झालाय. वैद्यकीय तपासणीत मुलावर अत्याचार झाल्याचं निष्पन्न झालंय. नेमकं काय आहे हे प्रकरण, जाणून घ्या.
त्रिशूर: प्रसिद्ध सोशल मीडिया इन्फ्लुएन्सर निशा राफेलवर केरळमधील त्रिशूर वेस्ट पोलीस ठाण्यात पोक्सो कायद्यांतर्गत गुन्हा दाखल झाला आहे. ११ वर्षांच्या मुलावर लैंगिक अत्याचार केल्याचा तिच्यावर गंभीर आरोप आहे. पोलिसांनी दिलेल्या माहितीनुसार, पीडित मुलाला वैद्यकीय आणि कायदेशीर तपासणीसाठी त्रिशूर जनरल रुग्णालयात नेण्यात आलं होतं. तिथल्या प्राथमिक तपासणीत मुलावर लैंगिक अत्याचार झाल्याचं स्पष्ट झालं आहे.
वैद्यकीय तपासणीत धक्कादायक खुलासा!
निशा राफेलवर गुन्हा दाखल होताच ही बातमी सोशल मीडियावर वाऱ्यासारखी पसरली. पोलिसांनी तातडीने मुलाची वैद्यकीय-कायदेशीर (Medico-Legal) तपासणी करून घेतली. या तपासणीच्या अहवालात लैंगिक अत्याचार झाल्याचं निष्पन्न झालं आहे. याच अहवालाच्या आधारे निशा राफेलवर रीतसर गुन्हा दाखल करण्यात आला आहे.
आरोप खोटे असल्याचा दावा
एकीकडे या प्रकरणाची जोरदार चर्चा सुरू असतानाच, निशा राफेलच्या जवळच्या सूत्रांनी मात्र हे सगळे आरोप फेटाळून लावले आहेत. असं काहीही घडलेलं नाही, ही सगळी खोटी बातमी आहे, असा दावा त्यांनी केलाय. हे प्रकरण पूर्णपणे बनावट असल्याचं त्यांचं म्हणणं आहे.
निशा आणि तक्रारदाराच्या कुटुंबात दोन फ्लॅट्सच्या मालकीवरून खूप जुना कायदेशीर वाद सुरू आहे. त्यांच्यात वैयक्तिक वैरही आहे. याच जुन्या रागातून आणि वैफल्यातून ही खोटी तक्रार दाखल करण्यात आल्याचा दावा निशाच्या बाजूने केला जातोय. दरम्यान, त्रिशूर वेस्ट पोलिसांनी या प्रकरणाचा तपास वेगवान केला असून सत्य शोधून काढण्यावर भर दिलाय. अधिकृत तक्रारीच्या आधारे निशा राफेलवर गुन्हा नोंदवण्यात आला असून, पोलीस आता या प्रकरणाचा सविस्तर तपास करत आहेत आणि पुढील कायदेशीर कारवाई सुरू आहे.