Dia Mirza : 'ओठ मोठे कर, ब्रेस्ट एन्हांसमेंट कर'.. दिया मिर्झाचा 'गलिच्छ' अनुभव

बॉलिवूड अभिनेत्री दिया मिर्झाने तिला लिप फिलर्स आणि ब्रेस्ट एन्हांसमेंट करण्याचा सल्ला देण्यात आल्याचा खुलासा केला आहे. तिने सांगितले की असे सल्ले नेहमी पुरुषांकडूनच मिळाले, पण तिने आपली नैसर्गिक ओळख बदलली नाही.

दिया मिर्झाने सांगितलं की, तिला नेहमीच तिच्या दिसण्यावरून सल्ले दिले जायचे. ओठ थोडे मोठे केले किंवा शरीरात कॉस्मेटिक बदल केले तर जास्त काम मिळेल, असं तिला सांगण्यात आलं. पण तिने या दबावापुढे झुकण्यास नकार दिला.

SheThePeople सोबत बोलताना दियाने सांगितलं की, 'मिस एशिया पॅसिफिक इंटरनॅशनल'चा किताब जिंकूनही तिला सतत तिच्या लुकबद्दल सल्ले दिले जायचे. या सल्ल्यांमुळे तिला स्वतःमध्येच कमतरता जाणवू लागली होती. पण तिने स्वतःला बदलण्यास नकार दिला.

Dia Mirza

अभिनेत्रीने स्पष्ट केलं की, तिला शरीर बदलण्याचा सल्ला कधीही कोणत्याही महिलेने दिला नाही. जे काही सल्ले किंवा कमेंट्स मिळाल्या, त्या पुरुषांकडूनच आल्या. यावरून मनोरंजनसृष्टीत महिलांसाठी असलेले सौंदर्याचे मापदंड पुरुषांच्या विचारांनी किती प्रभावित आहेत, हे दिसतं. तिने आपली नैसर्गिक ओळख न बदलल्याचा आज तिला आनंद आहे.

ब्युटी स्टँडर्ड्स, वाढतं वय आणि कॉस्मेटिक सर्जरीबद्दल दिया म्हणाली की, कोणत्याही महिलेने फक्त इंडस्ट्रीच्या मापदंडात बसण्यासाठी शरीरात बदल करण्याचं दडपण घेऊ नये. आत्मविश्वास आणि आपली नैसर्गिक ओळख स्वीकारणं हे कोणत्याही कॉस्मेटिक बदलापेक्षा जास्त महत्त्वाचं आहे, असं तिने सांगितलं.

दियाचा अनुभव काही एकटीचा नाही. गेल्या काही वर्षांत अनेक अभिनेत्रींनी इंडस्ट्रीत वय, रंग, शरीर आणि चेहऱ्याबाबत अवास्तव अपेक्षा ठेवल्या जात असल्याचं सांगितलं आहे. २०१७ मध्ये प्रकाशित झालेल्या "Analyzing Gender Stereotyping in Bollywood Movies" या संशोधनातही बॉलिवूडमध्ये महिलांना पारंपरिक सौंदर्य आणि मर्यादित भूमिकांमध्येच दाखवलं जातं, असं आढळून आलं. या संशोधनानुसार, चित्रपटांमध्ये महिलांच्या चित्रणात लैंगिक रूढीवाद फार पूर्वीपासून आहे.