Deepika Padukone: दीपिका पुन्हा होणार आई, 'धुरंधर' रणवीरने खास अंदाजात दिली गुड न्यूज

दीपिका पादुकोण आणि रणवीर सिंग पुन्हा एकदा आई-बाबा होणार आहेत. या जोडप्याने रविवारी इंस्टाग्रामवर एक पोस्ट शेअर करून ही गुड न्यूज दिली. त्यांनी खूप खास पद्धतीने प्रेग्नेंसीची घोषणा केली आहे. मुलगी दुआचा एक गोंडस फोटो शेअर करत त्यांनी दुसऱ्यांदा प्रेग्नेंट असल्याची माहिती दिली. त्यांच्या पोस्टवर चाहते आणि सेलिब्रिटी शुभेच्छांचा वर्षाव करत आहेत.

मनोरंजन विश्वातून एक मोठी आणि आनंदाची बातमी समोर येत आहे. बॉलिवूडचं पॉवर कपल दीपिका पादुकोण आणि रणवीर सिंग यांनी १९ एप्रिल, रविवारी चाहत्यांना एक जबरदस्त बातमी दिली. दीपिका दुसऱ्यांदा आई होणार आहे. या दोघांनी इंस्टाग्राम पोस्टद्वारे ही प्रेग्नेंसीची घोषणा केली आहे. दीपिका-रणवीरने मुलगी दुआचा एक फोटो शेअर केला आहे, ज्यामध्ये दुआच्या हातात प्रेग्नेंसी टेस्ट किट दिसत आहे. या पोस्टवर चाहते आणि बॉलिवूड सेलिब्रिटींकडून शुभेच्छांचा वर्षाव होत आहे.

दीपिका पादुकोणची खास पोस्ट

दीपिका पादुकोणने रविवारी सकाळी तिची मुलगी दुआचा एक फोटो पोस्ट केला. यात दुआ पांढऱ्या रंगाचा बॉडीसूट घालून बाबा रणवीरच्या मांडीवर बसलेली दिसत आहे. मात्र, या फोटोत दुआचा चेहरा दिसत नाहीये. फोटोमध्ये दुआच्या हातात एक प्रेग्नेंसी किट असून, त्यात टेस्ट रिझल्ट पॉझिटिव्ह दिसत आहे. या पोस्टमधून रणवीर-दीपिकाने दुसऱ्या प्रेग्नेंसीची बातमी कन्फर्म केली आहे. दीपिकाने पोस्टसोबत एक 'नजर' वाला इमोजी शेअर केला आहे. या कपलला कियारा अडवाणी, भूमी पेडणेकर, अर्जुन कपूर, सोनाक्षी सिन्हा, समंथा रुथ प्रभू, प्रियांका चोप्रा, परिणीती चोप्रा, अनन्या पांडे, सोनम कपूर, सिद्धार्थ मल्होत्रा, करीना कपूर यांच्यासह अनेक सेलिब्रिटींनी शुभेच्छा दिल्या. अवघ्या एका तासात दीपिकाच्या पोस्टवर 1 मिलियनपेक्षा जास्त लाईक्स आले आहेत.

2 वर्षांपूर्वी झाली होती आई

दोन वर्षांपूर्वी, म्हणजेच 8 सप्टेंबर 2024 रोजी दीपिका पादुकोणने मुलगी दुआला जन्म दिला होता. दुआ आता दोन वर्षांची झाली आहे. 2025 च्या दिवाळीच्या मुहूर्तावर या जोडप्याने त्यांची मुलगी दुआचा चेहरा चाहत्यांना दाखवला होता. रणवीर-दीपिकाने जवळपास 5 वर्षे डेटिंग केल्यानंतर 2018 मध्ये इटलीमध्ये थाटामाटात लग्न केलं होतं. लग्नानंतर या जोडप्याने मुंबईत 3 ग्रँड रिसेप्शन आयोजित केले होते. दीपिकाच्या वर्कफ्रंटबद्दल बोलायचं झाल्यास, ती शेवटची 2025 मध्ये आलेल्या 'सिंघम अगेन' या सिनेमात दिसली होती. तिच्या आगामी सिनेमांमध्ये शाहरुख खानसोबत 'किंग' आणि अल्लू अर्जुनसोबत 'राका' यांचा समावेश आहे. तर, रणवीरच्या वर्कफ्रंटबद्दल बोलायचं झाल्यास, त्याच्या 'धुरंधर' सिनेमाच्या दोन्ही भागांनी बॉक्स ऑफिसवर धुमाकूळ घातला होता. त्याचा आगामी सिनेमा 'प्रलय' आहे.