सेलिना जेटलीने पतीविरोधात थेट मुंबई कोर्टात घेतली धाव! पीटर हॅगवर लावला कौटुंबिक हिंसाचाराचा गंभीर आरोप; कोर्टाकडून नोटीस जारी!

बॉलिवूड अभिनेत्री सेलिना जेटलीने पती पीटर हॅग यांच्यावर कौटुंबिक हिंसाचाराचा गंभीर आरोप करत मुंबई न्यायालयात धाव घेतली आहे. क्रूरता आणि मानसिक छळाच्या आरोपांनंतर न्यायालयाने हॅग यांना नोटीस बजावली आहे. 

बॉलिवूड अभिनेत्री सेलिना जेटली हिने आपल्या पतीविरुद्ध गंभीर आरोप करत कौटुंबिक हिंसाचाराचा दावा मुंबईतील न्यायालयात दाखल केला आहे. ऑस्ट्रियन उद्योजक आणि हॉटेल व्यवसायिक पीटर हॅग यांच्याविरोधात तिने क्रूरता, मानसिक छळ आणि मनोवैज्ञानिक नियंत्रण केल्याचा आरोप केला आहे. सेलिनाच्या याचिकेनंतर न्यायालयाने हॅग यांना औपचारिक नोटीस पाठवली आहे. प्रकरणातील पुढील सुनावणी आणि आरोपांचे तपशील अद्याप प्रतीक्षेत आहेत.

2011 मध्ये झाले लग्न, दोन वेळा जुळी मुले; एकाचा मृत्यू

सेलिना आणि पीटर हॅग यांनी 2011 मध्ये ऑस्ट्रियामध्ये लग्न केले. लग्नानंतरच्या वर्षी, म्हणजे मार्च 2012 मध्ये, दाम्पत्याला जुळ्या मुलांचा आनंद लाभला. 2017 मध्ये त्यांना पुन्हा जुळी मुले झाली; मात्र त्यातील एक बाळाचा हायपो-प्लास्टिक हार्ट कंडिशनमुळे दुर्दैवी मृत्यू झाला. या घटनेनंतर सेलिना काही काळ चर्चेपासून दूर राहिली.

चित्रपटसृष्टीपासून दूर, वैयक्तिक आयुष्यात मोठे वळण

‘नो एंट्री’, ‘गोलमाल रिटर्न्स’, ‘थॅंक यू’, ‘अपना सपना मनी मनी’ अशा चित्रपटांमधून लोकप्रिय झालेल्या सेलिनाने गेल्या काही वर्षांत स्वतःला ग्लॅमर वर्तुळापासून दूर ठेवले होते. मात्र, वैयक्तिक आयुष्यातील मोठ्या घडामोडींमुळे ती पुन्हा चर्चेत आली आहे.

भावाच्या कथित अपहरणाबाबतही केली होती कायदेशीर कारवाई

या प्रकरणाच्या काही आठवडे आधीच सेलिनाने आणखी एक महत्त्वाची कायदेशीर याचिका दाखल केली होती. तिने दिल्ली न्यायालयात अर्ज करून आपल्या भावाचे मेजर (निवृत्त) विक्रांत जेटली संयुक्त अरब अमिरातीमध्ये “बेकायदेशीर अपहरण आणि ताब्यात ठेवण्यात आले आहे” असा गंभीर आरोप केला होता.

विक्रांत जेटली 2016 पासून दुबईत राहत असून MATITI ग्रुप या कन्सल्टिंग आणि रिस्क मॅनेजमेंट क्षेत्रातील कंपनीशी संबंधित होते. सप्टेंबर 2024 पासून त्यांच्याबाबत कोणतीही ठोस माहिती उपलब्ध नसल्याचे सेलिनाने न्यायालयाला सांगितले होते. परराष्ट्र मंत्रालयालाही त्यांच्या स्थिती, कायदेशीर प्रक्रिया किंवा आरोग्य याबद्दल माहिती देता आली नव्हती. दिल्ली न्यायालयाने आदेश देत सांगितले की त्यांच्या कुटुंबीयांना सेलिना आणि त्यांची पत्नी यांच्याशी थेट संपर्क साधता यावा, यासाठी आवश्यक पावले उचलावीत.

सेलिना जेटलीच्या आयुष्यातील या सलग कायदेशीर संघर्षामुळे तिच्या वैयक्तिक आयुष्यावर मोठे ढग दाटले असून, पुढील न्यायालयीन प्रक्रिया नेमके कोणते वळण घेते याकडे सर्वांचे लक्ष लागले आहे.