एआर रहमानच्या बँडमधील सदस्याचे पतीपासून विभक्त होण्याचे जाहीर

मुंबई: मंगळवारी संध्याकाळी संगीतकार एआर रहमान आणि त्यांची पत्नी सायरा बानू यांनी २९ वर्षांच्या वैवाहिक जीवनानंतर वेगळे होत असल्याची घोषणा केली. यानंतर काही तासांनीच एआर रहमान यांच्या बँडमधील बॅसिस्ट मोहिनी डे यांनीही आपल्या पतीपासून वेगळे होत असल्याचे जाहीर केले.
एकत्रित इंस्टाग्राम पोस्टमध्ये, मोहिनी आणि तिचे संगीतकार पती मार्क हार्टसूच यांनी त्यांचे नाते संपवण्याची घोषणा केली. मंगळवारी संध्याकाळी मोहिनी आणि मार्कने इंस्टाग्रामवर शेअर केलेल्या पोस्टमध्ये म्हटले आहे:

"मी आणि मार्क वेगळे होत आहोत ही बातमी दुःखाने कळवत आहोत. सर्वात आधी, आमच्या मित्र आणि कुटुंबियांना आम्ही हे कळवू इच्छितो की हा एक परस्पर संमतीने घेतलेला निर्णय आहे. आम्ही चांगले मित्र राहू, पण आयुष्यात वेगवेगळ्या गोष्टी हव्या आहेत आणि परस्पर संमतीने वेगळे होणे हाच पुढे जाण्याचा सर्वोत्तम मार्ग आहे असे आम्ही दोघांनी ठरवले आहे."

वेगळे झाल्यानंतरही ती आणि मार्क प्रकल्पांमध्ये सहकार्य करत राहतील असेही मोहिनीने सांगितले. "आम्ही अजूनही मामोगी, मोहिनी डे ग्रुपसह अनेक प्रकल्पांवर एकत्र काम करू. एकत्र चांगले काम करण्याचा आम्हाला नेहमीच अभिमान आहे आणि ते लवकरच थांबणार नाही" असे पोस्टमध्ये म्हटले आहे.

मित्र आणि चाहते त्यांना पाठिंबा देतील अशी अपेक्षाही त्यांनी व्यक्त केली. "आम्हाला जगभरातील सर्वांकडून फक्त प्रेम हवे आहे. तुम्ही आम्हाला दिलेल्या पाठिंब्याबद्दल आम्ही आभारी आहोत. या वेळी आम्ही घेतलेल्या निर्णयाचा सकारात्मक दृष्टिकोनातून आदर करा. आमच्या वैयक्तिक आयुष्याचा आदर करा आणि कोणतेही गैरसमज करून घेऊ नका" असे मोहिनी डेने आपल्या निवेदनात म्हटले आहे.

२९ वर्षीय मोहिनी ही कोलकाता येथील बास वादक आहे. ती गान बंगलाच्या विंड ऑफ चेंजचा भाग आहे. जगभरातील ४० हून अधिक कार्यक्रमांमध्ये ती एआर रहमानसोबत काम करत आहे. २०२३ च्या ऑगस्टमध्ये मोहिनीने तिचा पहिला अल्बम रिलीज केला होता.