Rajasthan Crime: नवऱ्यानेच काढली धिंड, महिलेला विवस्त्र करून मारहाण; राजस्थानमधील धक्कादायक घटना

बांसवाडा जिल्ह्यात एक धक्कादायक प्रकार समोर आला आहे. पळून गेल्याच्या आरोपावरून एका महिलेला तिच्याच कुटुंबाने विवस्त्र करून, मारहाण करत तिची धिंड काढली. पोलिसांनी या प्रकरणी १० आरोपींविरुद्ध गुन्हा दाखल केला आहे.

राजस्थानच्या बांसवाडा जिल्ह्यातून एक अत्यंत धक्कादायक घटना समोर आली आहे. इथे एका महिलेला तिच्याच कुटुंबातील लोकांनी सर्वांसमोर मारहाण केली, तिचे कपडे फाडले आणि तिला विवस्त्र करून तिची धिंड काढली. ही घटना १ सप्टेंबर रोजी रुस्तम नगरमध्ये घडली. या अमानुष कृत्याचा व्हिडिओ गुरुवारी समोर आला, ज्यात गावकरी महिलेला काठ्यांनी मारहाण करत असल्याचे आणि जमाव शांतपणे पाहत असल्याचे दिसत आहे.

पीडित महिलेच्या तक्रारीवरून पोलिसांनी तिचा नवरा आणि इतर ९ जणांविरुद्ध गुन्हा दाखल केला आहे. ३ सप्टेंबर रोजी नवरा आणि इतर सहा आरोपींना ताब्यात घेण्यात आले आहे.

अनवाणी चालवलं, केस कापले आणि कपडे फाडले

मिळालेल्या माहितीनुसार, आधी त्या महिलेला रस्त्यावरून अनवाणी चालण्यास भाग पाडण्यात आले. यावेळी गावकरी तिच्याभोवती जमा झाले होते. गर्दीतील लोक तिला मारहाण करा आणि तिचे केस कापा, असे ओरडत होते. तिच्या नवऱ्यासमोरच तिचे केस कापण्यात आले.

त्यानंतर गर्दीतील महिलांनी तिला मारहाण केली, तिचे कपडे फाडले आणि संपूर्ण गावातून तिची धिंड काढली. तिने स्वतःचा बचाव करण्याचा खूप प्रयत्न केला, पण तिच्यावरचा हल्ला थांबला नाही. अनेक गावकऱ्यांनी या घटनेचे व्हिडिओ रेकॉर्ड केले.

नंतर पीडित महिलेने पोलीस स्टेशन गाठून नवरा आणि कुटुंबातील इतर सदस्यांविरुद्ध मारहाण आणि असभ्य वर्तनाची तक्रार दाखल केली.

पोलिसांची कारवाई आणि तपास

पोलिसांनी सांगितले की, महिलेच्या तक्रारीवरून तिच्या नवऱ्याला ताब्यात घेण्यात आले आहे. व्हिडिओमध्ये दिसणाऱ्या इतर आरोपी महिलांचा शोध घेण्यासाठी पथके तयार करण्यात आली आहेत. हा हल्ला का झाला आणि इतके गावकरी त्यात का सामील झाले, याचा तपास अधिकारी करत आहेत. पीडित महिला सध्या तिच्या वडिलांच्या घरी राहत आहे.

गढीचे डीएसपी बाबूलाल यांनी सांगितले की, ती महिला १० दिवसांपूर्वी जवळच्या गावातील एका तरुणासोबत निघून गेली होती. तिच्या कुटुंबीयांनी तिला परत आणले आणि तिच्यावर पळून गेल्याचा आरोप केला. त्यांनी त्या तरुणालाही मारहाण केली.

सुरुवातीला कुटुंबीय तक्रार दाखल करण्यास तयार नव्हते, पण पोलिसांनी समुपदेशन केल्यानंतर त्यांनी तक्रार दिली. आपण त्या तरुणासोबत मजूर म्हणून काम करण्यासाठी गेलो होतो, असे महिलेने सांगितले आहे. तपासानंतरच संपूर्ण सत्य समोर येईल, असे पोलिसांनी स्पष्ट केले आहे.