Ajmer Viral Video: राजस्थानच्या अजमेरमध्ये पार्किंगच्या वादातून महिला ट्रॅफिक CO ने वकिलाला मारली कानशिलात
सार
अजमेरच्या किशनगडमध्ये पार्किंगच्या वादातून ट्रॅफिक CO अंजू यादव यांनी वकील बाबूलाल बागरिया यांच्या कानशिलात लगावली. या घटनेचा व्हिडिओ व्हायरल झाल्यानंतर वकिलांनी आंदोलन सुरू केले. अखेर मध्यस्थीनंतर यादव यांनी दिलगिरी व्यक्त केल्यावर हा वाद मिटला.
ट्रॅफिक सर्कल ऑफिसर (CO) अंजू यादव आणि वकील बाबूलाल बागरिया यांच्यात शुक्रवारी, ९ ऑक्टोबर रोजी राजस्थानमधील अजमेरच्या किशनगड मुख्य बाजारपेठेत रस्त्यावरील पार्किंगच्या मुद्द्यावरून जोरदार वाद झाला. या वादाचे रूपांतर नंतर एका मोठ्या राड्यात झाले.
या घटनेचा व्हिडिओ सोशल मीडियावर, विशेषतः एक्सवर (पूर्वीचे ट्विटर) व्हायरल होत आहे. या व्हिडिओमध्ये ट्रॅफिक CO अंजू यादव आणि वकील बाबूलाल बागरिया यांच्यात नो-पार्किंग झोनमध्ये गाडी उभी करण्यावरून बाचाबाची होताना दिसत आहे. त्यानंतर अंजू यादव यांनी भररस्त्यात लोकांसमोर वकिलाच्या थेट कानशिलात लगावली.
वकील बाबूलाल बागरिया यांनी स्थानिक भाजी मंडईजवळच्या गर्दीच्या रस्त्यावर आपली गाडी उभी केली होती. यामुळे वाहतुकीला अडथळा होत होता, आणि याच कारणावरून ट्रॅफिक CO आणि वकील यांच्यात हा वाद उफाळून आला.
सर्कल ऑफिसर आणि वकिलामध्ये नेमका वाद कसा झाला?
राजस्थानच्या अजमेर जिल्ह्यातील किशनगडमध्ये हा हाय-व्होल्टेज ड्रामा पाहायला मिळाला. ट्रॅफिक CO अंजू यादव यांनी गर्दीच्या भाजी मंडईजवळ गाडी उभी केल्यावरून वकील बाबूलाल बागरिया यांना जाब विचारला.
स्थानिक रिपोर्ट्सनुसार, बाबूलाल यांनी काही सामान खरेदी करण्यासाठी बाजारात आपली गाडी उभी केली होती. चुकीच्या पद्धतीने गाडी पार्क केल्यामुळे अंजू यादव त्यांच्याकडे गेल्या. सुरुवातीला ही एक सामान्य ट्रॅफिक तपासणी वाटत होती. पण जेव्हा बागरिया यांनी अधिकाऱ्याच्या बोलण्याच्या पद्धतीवर आक्षेप घेतला, तेव्हा या वादाचे रूपांतर मोठ्या भांडणात झाले.
वकिलाने आपली बाजू मांडण्याचा प्रयत्न केला, तेव्हा ट्रॅफिक सर्कल ऑफिसरने उपस्थित लोक आणि दुकानदारांसमोर त्यांच्या थेट कानशिलात लगावली. तिथे उपस्थित असलेल्या काहींनी हा प्रकार मोबाईल कॅमेऱ्यात कैद केला आणि तो व्हिडिओ नंतर सोशल मीडियावर व्हायरल झाला. अंजू यादव यांनी वकिलाच्या गाडीची चावी काढून घेतली आणि त्यांना धमकावल्याचा आरोपही केला जात आहे.
#Ajmer : Kishangarh : Female Police Officer Slaps Lawyer
In Kishangarh, Ajmer district, a dispute erupted between Traffic CO Anju Yadav and lawyer Babulal Bagariya over parking a vehicle on the road. During the altercation, the Traffic CO slapped the lawyer. A video of the incident has gone viral on social media, clearly showing the female officer slapping the lawyer.
#Rajasthan #viralvideo #BharatRaftarTV https://t.co/Uxee5qMac4
— MenToo (@MenTooSave) October 10, 2026
स्थानिक बार असोसिएशनने या घटनेनंतर तीव्र संताप व्यक्त केला. शेकडो वकील रस्त्यावर उतरले आणि त्यांनी स्थानिक प्रशासकीय कार्यालयाबाहेर जोरदार निदर्शने केली.
वकिलांनी ट्रॅफिक CO अंजू यादव यांच्या तात्काळ निलंबनाची आणि कडक कायदेशीर कारवाईची मागणी करत बाजारपेठेतील मुख्य चौक अडवून धरले. यामुळे वाहतुकीची मोठी कोंडी झाली. पोलिसांनी परिस्थिती नियंत्रणात आणण्यासाठी मोठा फौजफाटा तैनात केला होता.
अंजू यादव यांनी व्यक्त केली दिलगिरी
स्थानिक बार असोसिएशनचा वाढता रोष आणि राजस्थानभरातील वकील संघटनांच्या दबावानंतर, ट्रॅफिक CO अंजू यादव यांनी या दुर्दैवी घटनेबद्दल अधिकृतपणे खेद व्यक्त केला.
सिटी सर्कल ऑफिसर धर्मराज चौधरी यांनी दैनिक भास्करच्या वृत्तानुसार त्यांच्या कार्यालयात एक बैठक बोलावली होती. या बैठकीला पोलीस अधिकारी आणि बार असोसिएशनचे प्रतिनिधी उपस्थित होते. याच बैठकीत ट्रॅफिक CO अंजू यादव यांनी घडलेल्या प्रकाराबद्दल दिलगिरी व्यक्त केली.
अंजू यादव यांनी दिलगिरी व्यक्त करण्यासोबतच, भविष्यात असा प्रकार पुन्हा घडणार नाही, असे आश्वासन बार असोसिएशन आणि वकील वर्गाला दिले. यामुळे किशनगडमध्ये पोलीस आणि वकिलांमध्ये दिवसभर चाललेला हा तणाव अखेर निवळला.
बार असोसिएशनच्या प्रतिनिधींनी या आश्वासनानंतर आणि अधिकृत दिलगिरीनंतर आपले आंदोलन आणि रस्ता रोको मागे घेण्याचा निर्णय घेतला. ट्रॅफिक नियमांची अंमलबजावणी आणि सार्वजनिक उत्तरदायित्व यातील नाजूक समतोल दाखवून देणारी ही घटना ठरली.