५०० जणांना गंडा घालणाऱ्या मॅट्रिमोनील फसवणूकखोरास अटक

साइटवर येणाऱ्यांशी व्हॉट्सअॅपद्वारे संपर्क साधला जात असे. त्यानंतर बनावट बायोडाटा पाठवून पैसे उकळले जात असत.

रायपूर: बनावट मॅट्रिमोनिअल वेबसाइट बनवून पाचशेहून अधिक लोकांना फसवणाऱ्या एका तरुणाला अटक करण्यात आली आहे. बारावीपर्यंत शिक्षण घेतलेला हरीश भारद्वाज हा तरुण फसवणूक करत होता. सहा बनावट वेबसाइट बनवून अविवाहितांकडून त्याने पैसे उकळले. छत्तीसगडमधील बिलासपूर येथून भोपाळ सायबर क्राईम ब्रांचने आरोपीला अटक केली. 

इंडियन रॉयल मॅट्रिमोनी, सर्च रिश्ते, ड्रीम पार्टनर इंडिया, ७ फेअर मॅट्रिमोनी, संगम विवाह, माई शादी प्लॅनर अशा वेबसाइटद्वारे फसवणूक करण्यात आली. सोशल मीडियाद्वारे या वेबसाइट अविवाहितांपर्यंत पोहोचवल्या जात होत्या. इंटरनेटवरून डाउनलोड केलेल्या महिलांचे फोटो वापरून प्रोफाइल तयार केली जात होती. साइटवर येणाऱ्यांशी व्हॉट्सअॅपद्वारे संपर्क साधला जात असे. त्यानंतर बनावट बायोडाटा पाठवून पैसे उकळले जात असत. शेवटी लग्नाच्या विधींसाठी लागणारी रक्कमही घेतली जात असे.

हरीश भारद्वाज हा आरोपी बिलासपूरमध्ये बसून सर्व नियोजन करत होता. बनावट मॅट्रिमोनिअल साइटवर कर्मचाऱ्यांना नेमून त्यांना महिन्याला १०००० रुपये पगार दिला जात होता. अलिगढ, वाराणसी, बिलासपूर येथून टेलिकॉलर्स अविवाहितांना फोन करून पैसे उकळत होते. हेच कर्मचारी गरजेनुसार वधू किंवा समन्वयक म्हणूनही काम करत होते. दीड लाख रुपयांपर्यंत अविवाहितांकडून उकळण्यात आले.

भोपाळ येथील ४७ वर्षीय व्यक्तीने सायबर क्राईम ब्रांचकडे तक्रार दाखल केल्यानंतर फसवणूक उघडकीस आली. संगम विवाह मॅट्रिमोनीला त्याने १.५ लाख रुपये दिले होते, असे तक्रारदारने सांगितले. त्यानंतर हरीश भारद्वाजला अटक करण्यात आली. अशा वेबसाइटची सत्यता तपासून पहावी आणि संशयास्पद व्यवहार नॅशनल सायबर क्राईम रिपोर्टिंग पोर्टलवर नोंदवावे, असा इशारा पोलिसांनी दिला आहे.