हेअर ट्रान्सप्लांट ठरला मृत्यूचा सापळा! निष्काळजी डॉक्टरामुळे इंजिनिअरचा बळी
सार
कानपूरमध्ये एका निष्काळजी हेअर ट्रान्सप्लांटमुळे तरुण इंजिनिअरचा मृत्यू झाला. अयोग्य डॉक्टरकडून केलेल्या शस्त्रक्रियेनंतर झालेल्या इन्फेक्शनमुळे ही दुर्घटना घडली.
कानपूरमध्ये एका निष्काळजी हेअर ट्रान्सप्लांट प्रक्रियेने एका तरुण इंजिनिअरचा जीव घेतला आहे. केसाळ डोक्याच्या इच्छेपोटी एका सहाय्यक अभियंत्याने हेअर ट्रान्सप्लांट केले, पण त्यानंतर झालेल्या गंभीर इन्फेक्शनमुळे त्याचा दुर्दैवी मृत्यू झाला. या धक्कादायक घटनेमुळे आरोग्य क्षेत्रात एकच खळबळ उडाली असून, निष्काळजी डॉक्टरवर गुन्हा दाखल करण्यात आला आहे.
कानपूरच्या पनकी पॉवर प्लांटमध्ये सहाय्यक अभियंता म्हणून कार्यरत असलेले विनित दुबे यांनी १३ मार्च रोजी ‘इम्पायर क्लिनिक’ नावाच्या ठिकाणी हेअर ट्रान्सप्लांटची शस्त्रक्रिया करून घेतली. धक्कादायक बाब म्हणजे, अनुष्का तिवारी नामक डॉक्टरने कोणतीही आवश्यक वैद्यकीय चाचणी किंवा एलर्जीची तपासणी न करताच ही शस्त्रक्रिया केली. शस्त्रक्रियेनंतर काही तासांतच विनित यांची तब्येत बिघडायला सुरुवात झाली. त्यांच्या चेहऱ्यावर सूज आली आणि प्रकृती अधिकाधिक खालावली.
आजारी असतानाही विनित दोन वेळा डॉ. अनुष्काच्या क्लिनिकमध्ये उपचारासाठी गेले, पण त्यांच्या पत्नी आणि कुटुंबीयांना याची कल्पना नव्हती. १४ मार्च रोजी जेव्हा विनित यांची प्रकृती अधिकच बिघडली, तेव्हा डॉ. अनुष्कांनी त्यांच्या पत्नी जया यांना हॉस्पिटलमध्ये दाखल करण्याचा सल्ला दिला आणि त्यानंतर आपला फोन बंद करून टाकला.
पत्नी जया आणि कुटुंबीयांनी तातडीने विनित यांना हॉस्पिटलमध्ये दाखल केले, परंतु दुर्दैवाने उपचारादरम्यान १५ मार्च रोजी त्यांचा मृत्यू झाला. विनित यांच्या मृत्यूनंतर डॉ. अनुष्का आपले क्लिनिक बंद करून फरार झाल्या. विनित यांच्या पत्नी जया यांनी सांगितले की, पतीच्या मृत्यूआधी त्यांनी स्वतः डॉ. अनुष्काशी बोलले होते, तेव्हा डॉक्टरांनी हेअर ट्रान्सप्लांट व्यवस्थित न झाल्याने इन्फेक्शन झाल्याची कबुली दिली होती. या निष्काळजीपणामुळे विनित यांचा जीव गेला, या प्रकरणी पत्नीच्या तक्रारीवरून त्या महिला डॉक्टरविरोधात गुन्हा दाखल करण्यात आला आहे.
दरम्यान, पोलीस तपासात धक्कादायक माहिती समोर आली आहे. डॉ. अनुष्का ही मूळची हरियाणाची असून, तिच्याकडे कानपूरमध्ये क्लिनिक चालवण्यासाठी कोणतीही वैद्यकीय पदवी नव्हती. विनित यांच्या पत्नीने दोन महिन्यांनंतर आवाज उठवल्यावर पोलिसांनी या प्रकरणी गुन्हा दाखल केला.
तज्ज्ञांच्या मते, हेअर ट्रान्सप्लांट ही एक संवेदनशील शस्त्रक्रिया आहे आणि ती केवळ प्रशिक्षित व अनुभवी डॉक्टरांकडूनच करून घेणे आवश्यक आहे. कोणतीही एलर्जी चाचणी न करता केलेली शस्त्रक्रिया रक्तस्त्राव, इन्फेक्शन, सूज आणि जळजळ यांसारख्या गंभीर समस्यांना आमंत्रण देऊ शकते, ज्यामुळे रुग्णाचा जीवही धोक्यात येऊ शकतो. त्यामुळे, जर आपण हेअर ट्रान्सप्लांट करण्याचा विचार करत असाल, तर नेहमी अधिकृत आणि अनुभवी डॉक्टरांचा सल्ला घेणे अत्यंत महत्त्वाचे आहे. एक चुकीचा निर्णय आपल्या आयुष्यासाठी घातक ठरू शकतो, हे लक्षात घेणे गरजेचे आहे.