कल्याणमध्ये पुन्हा काळिमा, शूटिंग बघायला गेलेल्या चिमुकलीवर नराधमाचा अत्याचार

कल्याणजवळील आंबिवलीत ११ वर्षीय मुलीवर रात्रभर लैंगिक अत्याचार झाल्याची धक्कादायक घटना घडली आहे. दुकानदाराने मुलीला दुकानात डांबून ठेवून हे कृत्य केले. पोलिसांनी आरोपीला अटक केली आहे.

कल्याण शहराजवळच्या आंबिवली परिसरात एका निष्पाप 11 वर्षीय मुलीसोबत अत्यंत घृणास्पद आणि अमानुष कृत्य घडले आहे. शूटिंग पाहण्यासाठी उत्सुकतेने गेलेल्या या लहान मुलीला गणेश म्हात्रे नावाच्या एका राक्षसी मनोवृत्तीच्या दुकानदाराने त्याच्या दुकानात डांबून ठेवत रात्रभर तिच्यावर लैंगिक अत्याचार केला. या नीच कृत्यामुळे संपूर्ण परिसरात तीव्र संताप आणि भीतीचे वातावरण पसरले आहे. कल्याणमधील खडकपाडा पोलिसांनी तत्काळ कारवाई करत या नरपशूला बेड्या ठोकल्या आहेत.

पोलिसांनी दिलेल्या माहितीनुसार, खडकपाडा पोलीस स्टेशनच्या हद्दीत राहणारी 11 वर्षांची पीडित मुलगी असून तिचे आई-वडील भाजीपाला विकून आपला उदरनिर्वाह करतात. 5 मे रोजी रात्री आठच्या सुमारास ही मुलगी आपल्या एका मैत्रिणीच्या घरी जात असल्याचे सांगून घरातून बाहेर पडली. मात्र, रात्रभर ती घरी परत न आल्याने तिच्या कुटुंबियांनी तिची शोधाशोध सुरू केली, पण ती काही सापडली नाही. दुसऱ्या दिवशी सकाळी ती तिच्या घराच्या जवळपासच आढळून आली.

अंगावर काटा आणणारी घटना

घडलेल्या प्रकाराबद्दल जेव्हा तिच्या कुटुंबियांनी तिला विचारले, तेव्हा तिने आपल्यासोबत घडलेली भयावह कहाणी सांगितली. ती आंबिवली येथील नदीकिनारी सुरू असलेल्या एका चित्रपटाचे शूटिंग बघायला गेली होती. याच भागात आरोपी गणेश म्हात्रे याचे एक किराणा मालाचे दुकान आहे. या वासनांध राक्षसाची नजर त्या मुलीवर पडताच त्याने तिला आपल्या दुकानात बोलावले आणि जबरदस्तीने थांबण्यास सांगितले. जेव्हा मुलीने त्याला विरोध केला, तेव्हा त्याने तिला ओढून दुकानात घेतले आणि दुकानाचे शटर बंद केले. त्यानंतर त्याने त्या लहान मुलीवर रात्रभर अत्याचार केला.

पोलिसांची तत्काळ कारवाई, आरोपी अटकेत

या हृदयद्रावक घटनेची माहिती मिळताच, पीडित मुलीच्या कुटुंबियांनी त्वरित खडकपाडा पोलीस ठाण्यात धाव घेऊन आपली तक्रार नोंदवली. पोलिसांनी या घटनेचे गांभीर्य ओळखून तातडीने पाऊले उचलली आणि आरोपी गणेश म्हात्रे याला अटक केली. पोलिसांनी त्याच्याविरुद्ध गुन्हा दाखल केला असून पुढील कसून तपास सुरू आहे. या घटनेमुळे आंबिवली परिसरात प्रचंड आक्रोश आणि असुरक्षिततेची भावना निर्माण झाली आहे. एका लहान मुलीसोबत झालेल्या या अमानुष कृत्याचा सर्व स्तरांतून तीव्र निषेध व्यक्त होत आहे.