Chennai Crime: चेन्नईत चहाच्या दुकानात घुसून मालकावर जीवघेणा हल्ला

चेन्नईच्या रॉयपेट्टाहमध्ये सोमवारी रात्री उशिरा मद्यधुंद अवस्थेत असलेल्या दोघांनी चहाच्या दुकानात घुसून मालकावर धारदार शस्त्रांनी जीवघेणा हल्ला केला. या हल्ल्यात मालकाच्या हाताला आणि पोटाला गंभीर दुखापत झाली आहे.

चेन्नईच्या रॉयपेट्टाह भागात सोमवारी रात्री उशिरा एक धक्कादायक घटना घडली. मद्यधुंद अवस्थेत असलेल्या दोन तरुणांनी एका चहाच्या दुकानात घुसून मालकावर धारदार शस्त्रांनी सपासप वार केले. हल्लेखोरांनी मालकाच्या हातावर आणि पोटावर वार केले, दुकानाची तोडफोड केली आणि पळून जाण्यापूर्वी सीसीटीव्ही कॅमेरेही फोडले.

मन्सूर अली खान असे या जखमी दुकानदाराचे नाव आहे. ते रॉयपेट्टाहमधील कपूर स्ट्रीटचे रहिवासी आहेत आणि डॉ. बेझंट रोडवरील चारमिनार बिर्याणीजवळ अराफा टी स्टॉल चालवतात.

पोलिसांनी दिलेल्या माहितीनुसार, दोन हल्लेखोर चहाच्या दुकानात घुसले आणि त्यांनी खान यांच्यावर धारदार शस्त्रांनी हल्ला केला. त्यांनी त्यांच्या हातावर आणि पोटावर वार केले. त्यानंतर दुकानाची तोडफोड केली. पुरावे नष्ट करण्याच्या उद्देशाने दुकानात बसवलेले सीसीटीव्ही कॅमेरेही त्यांनी फोडले.

हल्ल्यानंतर कर्मचाऱ्यांनी जखमी दुकानदाराला तात्काळ सरकारी रॉयपेट्टाह रुग्णालयात दाखल केले. त्यांच्यावर सध्या उपचार सुरू आहेत.

याप्रकरणी आइस हाऊस पोलिसांनी गुन्हा दाखल करून हल्लेखोरांचा शोध सुरू केला आहे. संशयितांची ओळख पटवण्यासाठी आणि घटनेचा उलगडा करण्यासाठी पोलीस आजूबाजूच्या परिसरातील सीसीटीव्ही फुटेज तपासत आहेत.

महिन्याभरापूर्वीच डॉ. बेझंट रोडवरील चारमिनार बिर्याणी दुकानातही असाच हल्ला झाला होता. लागोपाठ घडणाऱ्या या घटनांमुळे स्थानिक व्यापाऱ्यांच्या सुरक्षेचा प्रश्न ऐरणीवर आला आहे.