600 किलो वजन... 400 किलो कमी करून जिंकला, पण शेवटी आयुष्यालाच मुकला!

Worlds Heaviest Man Juan Pedro Franco Dies : जगातील सर्वात वजनदार व्यक्ती म्हणून गिनीज रेकॉर्डमध्ये नोंद असलेले जुआन पेड्रो फ्रँको यांचे वयाच्या ४१ व्या वर्षी निधन झाले. कठोर प्रयत्नांनंतर सुमारे ४०० किलो वजन कमी करून ते बरे झाले होते.

Worlds Heaviest Man Juan Pedro Franco Dies : जगातील सर्वात वजनदार व्यक्ती म्हणून गिनीज वर्ल्ड रेकॉर्डमध्ये नाव नोंदवलेले मेक्सिकोचे जुआन पेड्रो फ्रँको (Juan Pedro Franco) यांचे वयाच्या ४१ व्या वर्षी निधन झाले. किडनीच्या संसर्गामुळे झालेल्या आरोग्य समस्यांमुळे त्यांचा मृत्यू झाल्याची माहिती आहे.

२०१७ मध्ये जुआन पेड्रो फ्रँको यांचे नाव गिनीज रेकॉर्डमध्ये नोंदवले गेले. त्यावेळी त्यांचे वजन ५९४.८ किलो होते. एका क्षणी त्यांचे वजन ६०६ किलोपर्यंत पोहोचले होते.

अतिरिक्त लठ्ठपणामुळे त्यांना अंथरुणावरून उठताही येत नव्हते. ते मधुमेह, उच्च रक्तदाब आणि थायरॉईडसारख्या अनेक गंभीर आजारांनी त्रस्त होते.

पुन्हा उभा राहिलेला विजेता

आपली प्रकृती सुधारण्यासाठी फ्रँको यांनी खूप प्रयत्न केले. त्यांनी कठोर डाएटचे पालन केले. 'स्लीव्ह गॅस्ट्रेक्टॉमी' आणि 'गॅस्ट्रिक बायपास' या दोन मोठ्या शस्त्रक्रियाही त्यांनी करून घेतल्या.

या परिश्रमामुळे २०२० पर्यंत त्यांनी सुमारे ४०० किलो वजन कमी केले आणि त्यांचे वजन २००-२१० किलोपर्यंत आणले. बऱ्याच काळानंतर ते स्वतःच्या पायावर उभे राहून चालू लागले. त्याच वर्षी ते कोविड-१९ मधून २२ दिवसांत बरे होऊन सर्वांना आश्चर्यचकित केले.

फ्रँको यांचे भावनिक शब्द

आपल्या भूतकाळाबद्दल बोलताना फ्रँको म्हणाले होते, "माझे शरीर कोणत्याही नियंत्रणाशिवाय वाढतच होते. मी रोज डाएटचे पालन करायचो, पण काहीच फायदा होत नसल्याने मी निराश झालो होतो. शस्त्रक्रियेनंतर, रोज सकाळी स्वतः उठून, एक ग्लास पाणी पिऊन, स्वच्छतागृहात जाणे, हाच माझ्यासाठी सर्वात मोठा आनंद आहे," असे त्यांनी एका मुलाखतीत भावनिक होऊन सांगितले होते.

डॉक्टरांचे मत

उत्तम वैद्यकीय उपचार मिळूनही, या वर्षाच्या अखेरीस त्यांना झालेले किडनीचे संक्रमण गंभीर झाले. याचा परिणाम इतर अवयवांवरही झाला आणि उपचारांना प्रतिसाद न दिल्याने त्यांचा मृत्यू झाला.

त्यांचे डॉक्टर जोस अँटोनियो कास्टानेडा म्हणाले, "लठ्ठपणा हा एक असा आजार आहे ज्यासाठी दीर्घकाळ काळजी घेणे आवश्यक आहे, हे फ्रँको यांनी जगाला दाखवून दिले. अत्यंत लठ्ठपणाविरुद्ध लढा देऊन ते अनेकांसाठी प्रेरणास्थान बनले," अशा शब्दांत त्यांनी कौतुक केले.