मुलाची विनवणी धुडकावत महिलेने लिफ्टमधून बाहेर काढले

कुत्र्यासोबत आलेल्या एका महिलेने लिफ्टमध्ये असलेल्या आठ वर्षांच्या मुलाला बाहेर ओढून काढल्याचा व्हिडिओ सोशल मीडियावर व्हायरल झाला आहे. ही घटना ग्रेटर नोएडामधील एका अपार्टमेंटमध्ये घडली. प्राण्यांसाठी काम करणाऱ्या एका संस्थेशी संबंधित असलेल्या महिलेने कुत्र्याला लिफ्टमध्ये आणू नका असे म्हणणाऱ्या मुलाला लिफ्टमधून बाहेर काढले.

व्हिडिओमध्ये एक आठ वर्षांचा मुलगा लिफ्टमध्ये एकटा उभा असल्याचे दिसत आहे. अचानक एक महिला आपल्या पाळीव कुत्र्यासह लिफ्टमध्ये येते. कुत्रा पाहून घाबरलेला मुलगा लिफ्टच्या एका कोपऱ्यात जातो. कुत्र्याला लिफ्टमध्ये आणू नका अशी विनवणी तो करतो. पण महिला त्याचे ऐकत नाही आणि त्याला लिफ्टमधून बाहेर ओढते. लिफ्टच्या बाहेर ती त्याला ढकलते. दरम्यान, कुत्रा लिफ्टमधून बाहेर पडतो आणि तिघेही दृश्यातून बाहेर जातात. काही वेळाने लिफ्टचा दरवाजा उघडतो आणि मुलगा रडत आत येतो. लिफ्टच्या बाहेर महिला उभी असल्याचे दिसते. लिफ्टचा दरवाजा बंद झाल्यानंतरही मुलगा रडत असल्याचे आणि घाबरल्याचे दिसून येते.

ग्रेटर नोएडा वेस्ट या ट्विटर हँडलवरून हा व्हिडिओ शेअर करण्यात आला आहे. गौर सिटी २ मधील १२ व्या एव्हेन्यूचा हा सीसीटीव्ही फुटेज सोशल मीडियावर व्हायरल झाला आहे. महिलेविरुद्ध कारवाईची मागणी करत अनेकांनी नोएडा पोलिसांना टॅग केले आहे. व्हिडिओ व्हायरल झाल्यानंतर पोलिसांनी गुन्हा दाखल करून तपास सुरू केला आहे. लिफ्टमध्ये कुत्रे आणू नयेत असे अपार्टमेंटमधील इतर रहिवाशांनी महिलेला सांगितले होते. यावरून पूर्वीही अपार्टमेंटमध्ये वाद झाले होते, असे वृत्त आहे. काही जणांनी 'मूर्ख प्राणीप्रेमी' अशी प्रतिक्रिया दिली आहे.