Canva: नोकरीवरून काढलं तरीही महिलेने केली कंपनीची स्तुती; म्हणाली, 'आतापर्यंतची सर्वोत्तम कंपनी'

कॅनव्हा (Canva) कंपनीने नुकत्याच केलेल्या कर्मचारी कपातीत १,२७१ जणांना नोकरीवरून काढलं. यात श्रद्धा खुळे या तरुणीचाही समावेश होता. पण नोकरी गमावूनही तिने सोशल मीडियावर एक व्हिडीओ शेअर करत कॅनव्हाला आतापर्यंतची सर्वोत्तम कंपनी म्हटलं आहे.

नोकरी जाणं हा कोणासाठीही मोठा धक्का असतो. पण कॅनव्हा (Canva) कंपनीने कामावरून काढल्यानंतरही एका महिलेने कंपनीचं तोंडभरून कौतुक केलं आहे. मोठ्या प्रमाणावर कर्मचारी कपात होऊनही तिने कॅनव्हाला आतापर्यंतची सर्वोत्तम कंपनी म्हटलंय. कठीण काळातही कंपनीने दिलेली साथ आणि समजून घेण्याच्या वृत्तीचं तिने कौतुक केलं आहे.

श्रद्धा खुळे असं या महिलेचं नाव आहे. ती २०२३ मध्ये कॅनव्हामध्ये रुजू झाली होती. कॅनव्हामध्ये काम करणं हे तिचं स्वप्न होतं. इन्स्टाग्रामवर एक व्हिडीओ शेअर करत तिने नोकरी गेल्याचं दुःख व्यक्त केलं.

"आज माझी कॅनव्हामधली नोकरी गेली. मला अजूनही यावर विश्वास बसत नाहीये. मी २०२३ मध्ये कॅनव्हा जॉईन केली होती आणि तिथे काम करणं माझं स्वप्न होतं. पण जेव्हा मला नोकरी गेल्याचा ईमेल आला, तेव्हा मला खरंच काही सुचेनासं झालं," असं श्रद्धा म्हणाली.

हा व्हायरल व्हिडीओ इथे पाहा: 

नोकरी गेल्याचं दुःख असूनही श्रद्धाने कंपनीबद्दल कृतज्ञता व्यक्त केली. मॅटर्निटी लीव्ह (बाळंतपणाची रजा) दरम्यान कंपनीने तिला खूप सपोर्ट केला. मॅनेजरशी बोलल्यानंतर तिला ही रजा काही महिन्यांसाठी वाढवूनही मिळाली होती.

ती काही काळासाठी दुबईला शिफ्ट झाली होती, तेव्हाही कंपनीने तिला कामात लवचिकता (flexibility) दिली होती.

"कॅनव्हा ही मी काम केलेली आतापर्यंतची सर्वोत्तम कंपनी आहे. फक्त कामाच्या वेळीच नाही, तर माझ्या मॅटर्निटी लीव्हच्या काळातही त्यांनी मला खूप समजून घेतलं," असं ती म्हणाली.

नोकरी गेली असली तरी ती इतरांना या कंपनीत काम करण्याचा सल्ला देते.

"जर तुम्हाला कधी कॅनव्हामध्ये काम करण्याची संधी मिळाली, तर ती नक्की घ्या. कारण अशी कंपनी तुम्हाला पुन्हा मिळणार नाही. माझ्या करिअरमधला तो सर्वोत्तम काळ होता," असं तिने सांगितलं.

कॅनव्हाने नुकतीच कंपनीत मोठी पुनर्रचना केली आहे. यात तब्बल १,२७१ कर्मचाऱ्यांना (एकूण कर्मचाऱ्यांच्या २२ टक्के) कामावरून काढण्यात आलं आहे. नोकरीवरून काढलेल्या कर्मचाऱ्यांना कंपनीने सेव्हरन्स पे, हेल्थकेअर कव्हरेज आणि करिअर असिस्टन्स देण्याचं जाहीर केलं आहे.

श्रद्धाच्या या व्हिडीओनंतर सोशल मीडियावर लेऑफच्या काळात कंपन्यांनी कर्मचाऱ्यांशी कसं वागावं, यावर मोठी चर्चा सुरू झाली आहे.