Fat Hawk : कोंबड्या खाऊन खाऊन ससाणा झाला इतका लठ्ठ की उडताही येईना!

व्हर्जिनियामध्ये एक ससाणा (hawk) उडू शकत नसल्याने त्याला वन्यजीव केंद्रात आणण्यात आले. तज्ज्ञांनी तपासणी केली तेव्हा त्यांना समजले की हा पक्षी जखमी नाही, तर कोंबड्या खाऊन त्याचे वजन ९१० ग्रॅमपेक्षा जास्त वाढले आहे, ज्यामुळे त्याला उडता येत नाहीये.

मुंबई : शिकारी पक्षी असूनही उडता न येणं, याची कल्पना करा! अमेरिकेतील व्हर्जिनियामध्ये एका मादी ससाण्यासोबत (hawk) असंच काहीसं घडलं. मोकाट फिरणाऱ्या कोंबड्यांवर ताव मारल्याने तिचं वजन इतकं वाढलं की तिला उडणंच कठीण झालं.

RSHA 26-2599 नावाने ओळखला जाणारा हा ससाणा 'साउथवेस्ट व्हर्जिनिया वाइल्डलाइफ सेंटर ऑफ रोआनोक'पासून सुमारे एक मैल अंतरावर एका घराबाहेर असहाय्य अवस्थेत सापडला. पक्षी आजारी असावा या भीतीने त्याला शोधणाऱ्या व्यक्तीने तपासणीसाठी केंद्रात आणले.

सुरुवातीला वन्यजीव तज्ज्ञांना वाटले की पक्षी जखमी असेल किंवा त्याला काही आजार असेल. त्यांनी हाडं मोडली आहेत का, डोळ्यांची समस्या, डोक्याला मार लागलाय का, याची तपासणी केली. पण आश्चर्याची गोष्ट म्हणजे, यापैकी कोणतंही कारण पक्ष्याला उडता न येण्यामागे नव्हतं.

येथे व्हायरल पोस्ट पाहा: 

यामागचं खरं कारण खूपच वेगळं होतं. या ससाण्याचं वजन ९१० ग्रॅमपेक्षा जास्त भरलं होतं. त्याच्या शरीरावर चरबीचा इतका जाड थर साचला होता की तज्ज्ञांना त्याचं छातीचं हाडही (keel bone) जाणवत नव्हतं.

वन्यजीव केंद्राने सोशल मीडियावर पोस्ट करत सांगितलं की, "निदान: ९१० ग्रॅमपेक्षा जास्त वजन असल्याने ती उडण्यासाठी खूपच लठ्ठ झाली होती! चरबीच्या जाड थरामुळे आम्ही तिचं छातीचं हाडही तपासू शकलो नाही."

पण एका शिकारी पक्ष्याची अशी अवस्था कशी झाली? स्थानिक लोकांशी बोलल्यानंतर याचं उत्तर मिळालं. गेल्या काही आठवड्यांपासून परिसरातील मोकाट कोंबड्या गायब होत होत्या.

केंद्राने स्पष्ट केले: "ही राणी तिच्यासमोर असलेल्या सोप्या शिकारीवर ताव मारत होती, पोटभर खात होती आणि पुन्हा भूक लागेपर्यंत जवळच्या झाडांवर झोप काढत होती."

ही विचित्र घटना इंटरनेटवर वेगाने व्हायरल झाली. एका युजरने कमेंट केली, "'लठ्ठ' या निदानाने मला हसवलं."

ही घटना गमतीशीर वाटत असली तरी, जमिनीवर असलेल्या ससाण्याला मोठ्या शिकारी प्राण्यांपासून खूप धोका असतो, असा इशारा तज्ज्ञांनी दिला. तसेच, वन्यजीवांना खायला घालू नका आणि पाळीव प्राण्यांना त्यांची शिकार होण्यापासून वाचवा, असे आवाहनही केंद्राने केले.