WhatsApp: आता टेक्स्ट मेसेजही होणार गायब! व्हॉट्सॲप आणतंय 'सिक्रेट मेसेज' मोड

WhatsApp: व्हॉट्सॲप लवकरच आयफोन युझर्ससाठी 'व्ह्यू वन्स' टेक्स्ट मेसेज फीचर आणणार असल्याची माहिती आहे. या फीचरमुळे युझर्सची प्रायव्हसी अधिक सुरक्षित होईल अशी अपेक्षा आहे.

पाठवलेला मेसेज समोरच्या व्यक्तीला एकदाच वाचता येईल

सध्या व्हॉट्सॲपवर फोटो, व्हिडिओ आणि व्हॉइस नोट्स 'व्ह्यू-वन्स' पद्धतीने पाठवता येतात. म्हणजे समोरची व्यक्ती ते फक्त एकदाच पाहू किंवा ऐकू शकते. आता हीच संकल्पना टेक्स्ट मेसेजसाठीही आणली जात आहे. हे फीचर आल्यावर, युझर्स मेसेज टाइप करून 'Send' बटण दाबून धरतील, तेव्हा 'Send as View Once' हा पर्याय दिसेल. याने पाठवलेला मेसेज समोरच्या व्यक्तीला एकदाच वाचता येईल. मेसेज उघडल्यावर तो पुन्हा दिसणार नाही.

'व्ह्यू-वन्स' फाइल्सना लागू होणारे नियमच टेक्स्ट मेसेजलाही लागू

हे फीचर वैयक्तिक चॅट आणि ग्रुप चॅट दोन्हीमध्ये उपलब्ध असेल अशी अपेक्षा आहे. पण, व्हॉट्सॲप चॅनल्समध्ये ते मिळण्याची शक्यता नाही. 'व्ह्यू-वन्स' मीडिया फाइल्सना लागू होणारे नियमच या टेक्स्ट मेसेजलाही लागू होतील. म्हणजेच, हे मेसेज कॉपी, फॉरवर्ड किंवा शेअर करता येणार नाहीत. तसेच, स्क्रीनशॉट काढणं आणि स्क्रीन रेकॉर्डिंग करणंही ब्लॉक केलं जाईल.

नवीन फीचर

सध्या अनेक जण तात्पुरती माहिती देण्यासाठी 'व्ह्यू-वन्स' फोटोवरच टेक्स्ट लिहून पाठवतात. हे नवीन फीचर आल्यास युझर्सना एक सोपा आणि खास पर्याय मिळेल. एंड-टू-एंड एन्क्रिप्शन, गायब होणारे मेसेज आणि व्ह्यू-वन्स मीडिया यांसारख्या फीचर्सनंतर हे नवीन फीचर व्हॉट्सॲपची प्रायव्हसी आणखी मजबूत करेल. आता युझर्स कंपनीच्या अधिकृत घोषणेची वाट पाहत आहेत.