Viral Video: डेल्टा एअरलाइन्सच्या पायलटची भन्नाट अनाउन्समेंट, व्हिडिओ व्हायरल

डेल्टा एअरलाइन्सचा पायलट निक सध्या इन्स्टाग्रामवर चांगलाच व्हायरल होत आहे. फ्लाईट उड्डाण घेण्यापूर्वी त्याने प्रवाशांसोबत 'लू विथ अ व्ह्यू' आणि आजारी व्हेल माशासारखा इंजिनचा आवाज यावर भन्नाट जोक्स केले. या व्हायरल व्हिडिओला आतापर्यंत ४.७ दशलक्ष (4.7 मिलियन) पेक्षा जास्त व्ह्यूज मिळाले असून लोक त्याच्या सेन्स ऑफ ह्युमरचं कौतुक करत आहेत.

विमानात बसल्यावर सहसा आपल्याला सुरक्षेचे नियम, हवामानाची माहिती आणि सीटबेल्ट लावण्याच्या सूचना ऐकायला मिळतात. पण डेल्टा एअरलाइन्सच्या एका पायलटने या नेहमीच्या कंटाळवाण्या अनाउन्समेंटमध्ये कॉमेडीचा तडका लावला. त्याने 'लू विथ अ व्ह्यू' (loo with a view), आजारी व्हेल मासा आणि स्वतःच्या विमान उडवण्याच्या कौशल्यावर असे काही जोक्स मारले की प्रवासी हसून हसून वेडे झाले. रचेल (Rachael) नावाच्या एका प्रवासी महिलेने हा मजेशीर व्हिडिओ इन्स्टाग्रामवर शेअर केला आहे. या व्हिडिओला आतापर्यंत ४.७ दशलक्ष (4.7 मिलियन) पेक्षा जास्त व्ह्यूज मिळाले असून नेटकरी या पायलटच्या ह्युमरच्या प्रेमात पडले आहेत.

या व्हिडिओमध्ये निक नावाचा हा पायलट वॉशरूम वापरणाऱ्या प्रवाशांना एक भन्नाट सल्ला देताना दिसतो. तो प्रवाशांना सांगतो की, विमानाच्या अगदी मागे जा आणि उजवीकडचं वॉशरूम वापरा. "तिथे एक खिडकी पण आहे, त्यामुळे तुम्हाला 'लू विथ अ व्ह्यू' मिळेल," असं तो गमतीत म्हणतो. पुढे तो असंही सांगतो की, "मी स्वतः तिथे गेलो तर खिडकीचा पडदा खाली खेचणं पसंत करेन, कारण बाहेरून कोण उडत जाईल सांगता येत नाही." त्याच्या या इशाऱ्यावर विमानात एकच हशा पिकतो. पण निकची कॉमेडी इथेच थांबत नाही. विमान धावपट्टीवर असताना इंजिनमधून येणाऱ्या विचित्र आवाजाबद्दलही तो प्रवाशांना पूर्वकल्पना देतो. "इंजिनमधून थोडे गमतीशीर आवाज येऊ शकतात. बाहेर पंख्याजवळ एखादा आजारी व्हेल मासा ओरडल्यासारखा आवाज येईल," असं म्हणत तो प्रवाशांना घाबरू नका, हा आवाज नॉर्मल आहे, असा दिलासा देतो.

विमान एकदा हवेत झेपावलं की, इंजिनचा आवाज "एखाद्या लहान मांजराच्या पिल्लासारखा (purr like a little kitten)" येईल, असंही तो सांगतो. त्यानंतर निक पुढच्या प्रवासाबद्दल बोलतो. आज आपल्याला खूप छान वाटत असल्याचं तो प्रवाशांना सांगतो. प्रवाशांना त्यांच्या इच्छित स्थळी वेळेत आणि सुरक्षित पोहोचवण्याचं वचन तो देतो. एवढंच नाही तर, ठरलेल्या वेळेपेक्षा आधीच विमान पोहोचवण्याचा गमतीशीर दावाही तो करतो.

लहान मुलांसाठीही या पायलटने एक खास ऑफर दिली. विमान लँड झाल्यानंतर ज्या मुलांना फ्लाईट डेक पाहायचा आहे, त्यांना त्याने स्वतःच्या सीटवर बसून फोटो काढण्याचं आमंत्रण दिलं. शेवटी, डेल्टा एअरलाइन्ससोबत प्रवास केल्याबद्दल निकने सर्व प्रवाशांचे आभार मानले. "माझं माझ्या कामावर खूप प्रेम आहे. तुम्ही लोक मला हे काम करू देता, त्याबद्दल मी तुमचा खरोखर आभारी आहे," असं तो म्हणाला.

पाहा व्हायरल व्हिडिओ

निकच्या या भन्नाट अनाउन्समेंटवर प्रवाशांनी टाळ्या वाजवून आणि ओरडून दाद दिली. सोशल मीडियावरील युजर्सचंही या व्हिडिओने चांगलंच मनोरंजन केलं आहे. एका कंटाळवाण्या प्रवासाला इतकं मजेशीर बनवल्याबद्दल अनेकजण या पायलटचं कौतुक करत आहेत. काहींनी 'या व्हिडिओने आपला दिवस बनवला' असं म्हटलंय, तर काहींनी डेल्टाच्या कर्मचाऱ्यांसोबत प्रवास करणं हा एक सुखद अनुभव असल्याचं सांगितलं आहे.