ट्रम्प यांची फ्रान्सला 200% टॅरिफ लावण्याची धमकी, 'बोर्ड ऑफ पीस'ला नकार देणे भोवणार

Trump Threatens France With 200 Percent Tariff : ट्रम्प यांनी त्यांचे सोशल मीडिया प्लॅटफॉर्म 'ट्रुथ सोशल'वरून फ्रान्सचे राष्ट्राध्यक्ष इमॅन्युएल मॅक्रॉन यांच्यावर वैयक्तिक टीकाही केली.

Trump Threatens France With 200 Percent Tariff : अमेरिकेचे राष्ट्राध्यक्ष डोनाल्ड ट्रम्प यांनी 'बोर्ड ऑफ पीस'मध्ये सामील होण्याचे आमंत्रण नाकारल्याबद्दल फ्रान्सला मोठी धमकी दिली आहे. फ्रान्समधून येणाऱ्या वाईन आणि शॅम्पेनवर 200 टक्के आयात शुल्क लावण्याचा इशारा ट्रम्प यांनी दिला आहे. शांतता समितीत सहभागी न होण्याच्या पॅरिसच्या भूमिकेमुळे संतप्त होऊन ट्रम्प यांनी हे पाऊल उचलले आहे.

ट्रम्प यांनी त्यांचे सोशल मीडिया प्लॅटफॉर्म 'ट्रुथ सोशल'वरून फ्रान्सचे राष्ट्राध्यक्ष इमॅन्युएल मॅक्रॉन यांच्यावर वैयक्तिक टीकाही केली. डेन्मार्कचा भाग असलेल्या ग्रीनलँड बेटाबद्दल मॅक्रॉन यांनी पाठवलेला खासगी संदेश ट्रम्प यांनी सार्वजनिक केला. ग्रीनलँड खरेदी करण्याच्या ट्रम्प यांच्या इच्छेची फ्रान्सने खिल्ली उडवली होती, त्याला प्रत्युत्तर म्हणून हा खुलासा करण्यात आला आहे. आर्कटिक प्रदेशात ट्रम्प यांच्या आवडीबद्दल अमेरिकेचे ट्रेझरी सेक्रेटरी स्कॉट बेसेंट यांनी दिलेल्या स्पष्टीकरणाची फ्रान्सने यापूर्वी खिल्ली उडवली होती.

यामुळे अमेरिका आणि फ्रान्समधील राजनैतिक संबंध अत्यंत गंभीर संकटात सापडले आहेत. युरोपीय देशांमध्ये ट्रम्प यांच्या नवीन शांतता समितीला विरोध वाढत असताना, फ्रान्सला लक्ष्य करून हा हल्ला करण्यात आला आहे.