सुनीता विल्यम्स यांचे पृथ्वीवर परतणे आणखी लांबणीवर

सुनीता विल्यम्स: आंतरराष्ट्रीय अंतराळ स्थानकात अडकलेल्या भारतीय वंशाच्या अंतराळवीर सुनीता विल्यम्स आणि बुच विल्मोर यांचे पृथ्वीवर परतणे आणखी लांबणीवर पडणार आहे. फेब्रुवारीऐवजी मार्च अखेर किंवा एप्रिलमध्ये परतण्याची शक्यता आहे.

केप कॅनव्हेरल: अनेक महिन्यांपासून आंतरराष्ट्रीय अंतराळ स्थानकात अडकलेल्या भारतीय वंशाच्या अंतराळवीर सुनीता विल्यम्स आणि बुच विल्मोर यांचे पृथ्वीवर परतणे आणखी लांबणीवर पडणार आहे. 

पूर्वीच्या फेब्रुवारीऐवजी मार्च अखेर किंवा एप्रिलमध्ये परतण्याची शक्यता आहे, असे अमेरिकन अंतराळ संस्था 'नासा'ने म्हटले आहे.

बोईंगच्या स्टारलाइनर अंतराळ यानातून दोघे जूनमध्ये अंतराळ केंद्रात गेले होते. परंतु तांत्रिक समस्येमुळे ते तिथेच अडकले. सुनीता आणि विल्मोर पुढील वर्षी फेब्रुवारीमध्ये पृथ्वीवर परत येतील, असे नासाने म्हटले होते.

परंतु बुधवारी नासाने नवीन निवेदन दिले आहे की, विल्मोर आणि विल्यम्स यांना परत आणण्यापूर्वी नवीन ४ कर्मचाऱ्यांना पाठवायचे आहे. परंतु यातही काही तांत्रिक समस्या उद्भवल्या आहेत. त्यामुळे या मोहिमेसाठी एका महिन्यापेक्षा जास्त वेळ लागेल. म्हणून सुनीता आणि विल्मोर मार्च अखेरपर्यंत किंवा एप्रिलपर्यंत परत येणार नाहीत, असे नासाने म्हटले आहे.

स्पेसएक्सला या प्रकल्पासाठी जास्त वेळ लागत असल्याने विलंब होत आहे, असे म्हटले जात आहे.