दक्षिण कोरियातील मुआन विमानतळावर विमान दुर्घटना; १७९ जणांचा मृत्यू (Video)

दक्षिण कोरियातील मुआन आंतरराष्ट्रीय विमानतळावर रविवारी जेजू एअरचे विमान कोसळले. या दुर्घटनेत १८१ प्रवाशांपैकी १७९ जणांचा मृत्यू झाला आहे. विमान बँकॉकहून येत होते आणि लँडिंगदरम्यान हा अपघात झाला.

दक्षिण कोरियातील मुआन आंतरराष्ट्रीय विमानतळावर रविवारी सकाळी मोठा अपघात झाला. १८१ जणांना घेऊन जाणारे जेजू एअरचे बोईंग ७३७-८०० विमान धावपट्टीवर कोसळले. या अपघातात १७९ जणांचा मृत्यू झाला आहे. १८१ प्रवाशांपैकी फक्त दोन जण वाचले असल्याची शक्यता आहे.

विमानाने बँकॉकहून उड्डाण घेतले होते. स्थानिक वेळेनुसार सकाळी ९.०७ वाजता ते धावपट्टीवर उतरत असताना घसरले. विमान धावपट्टीवरून जात असताना एका कुंपणाला धडकले. यानंतर विमानाला आग लागली. सोशल मीडियावर शेअर केलेल्या फोटो आणि व्हिडिओंमधून विमानाला आग लागल्याचे दिसून येत आहे.

विमानात होते १७५ प्रवासी आणि ६ क्रू मेंबर्स

योनहाप न्यूज एजन्सीनुसार, विमानात १७५ प्रवासी (१७३ दक्षिण कोरियाचे आणि २ थाई नागरिक) आणि ६ क्रू मेंबर्स होते. अपघाताची माहिती मिळताच मदत कर्मचारी घटनास्थळी पोहोचले. विमानातील लोकांना बाहेर काढण्यात आले. दक्षिण कोरियाचे राष्ट्राध्यक्ष चोई सुंग-मोक यांनी बचाव कार्याला प्राधान्य देण्याचे निर्देश दिले आहेत. मुआन आंतरराष्ट्रीय विमानतळावरील ही पहिली मोठी घटना आहे. हे दक्षिण जिओला प्रांताचे महत्त्वाचे प्रादेशिक केंद्र आहे.

विमानाच्या लँडिंग गिअरमध्ये बिघाड झाल्याची शक्यता

योनहॅपच्या रिपोर्टनुसार, अपघाताचे कारण शोधण्यासाठी तपास सुरू आहे. स्थानिक मीडिया रिपोर्ट्सनुसार, विमानाच्या लँडिंग गिअरमध्ये बिघाड झाला होता. २५ डिसेंबर रोजी अझरबैजान एअरलाइन्सचे विमान कझाकस्तानच्या अकताऊजवळ क्रॅश झाले होते. या विमानातील ६७ जणांपैकी ३८ जणांचा मृत्यू झाला.

आणखी वाचा-