Peru Airport News: पेरू विमानतळावर ३ सुटकेसमध्ये सापडले ३००० कोळी, मोज्यांमध्ये लपवून चालवली होती तस्करी

पेरू विमानतळावर अधिकाऱ्यांनी वन्यजीव तस्करीचा एक धक्कादायक प्रकार उघडकीस आणला आहे. तीन सुटकेसमध्ये घाणेरड्या मोज्यांमध्ये लपवून तब्बल ३,००० टॅरंटुला कोळी जर्मनीला नेले जात होते.

पेरूच्या लिमा येथील विमानतळावर सुरक्षा अधिकाऱ्यांनी वन्यजीव तस्करीचा एक मोठा डाव हाणून पाडला आहे. अधिकाऱ्यांना तीन सुटकेसमध्ये तब्बल ३,००० टॅरंटुला कोळी लपवून ठेवलेले आढळले. नॅशनल फॉरेस्ट्री अँड वाइल्डलाइफ सर्व्हिस (SERFOR) च्या माहितीनुसार, दोन जर्मन आणि एका पोलिश नागरिकाकडे हे पार्सल होते.

हे कोळी घाणेरड्या मोज्यांमध्ये भरून सामानात लपवले होते. कस्टम अधिकाऱ्यांची नेहमीची तपासणी सुरू असताना त्यांना सुटकेसमध्ये काहीतरी हालचाल जाणवली आणि हा धक्कादायक प्रकार समोर आला.

सामानात काहीतरी वळवळत असल्याचं पाहून अधिकाऱ्यांना संशय आला. त्यांनी सुटकेस उघडून बारकाईने पाहिलं तेव्हा आत शेकडो कोळी भरलेले दिसले.

युरोपियन मार्केटमध्ये या कोळ्यांची किंमत जवळपास १.५ दशलक्ष युरो

जप्त केलेले हे टॅरंटुला कोळी पेरूमधून जर्मनीला तस्करी करून नेले जात होते. SERFOR च्या वन्यजीव नियंत्रण तंत्रज्ञ कोरा सुआरेझ यांनी सांगितलं की, सापडलेल्या कोळ्यांमध्ये अगदी लहान पिल्लांपासून ते मोठ्या कोळ्यांपर्यंत वेगवेगळ्या आकाराचे कोळी आहेत.

सुआरेझ यांच्या मते, युरोपियन मार्केटमध्ये एका टॅरंटुला कोळ्याला साधारण ५०० युरो मिळतात. या हिशोबाने, जप्त केलेल्या या सर्व कोळ्यांची एकूण किंमत जवळपास १.५ दशलक्ष युरो असू शकते.

अधिकाऱ्यांना या सामानात अंडी, नुकतीच जन्मलेली पिल्लं आणि पूर्ण वाढ झालेले कोळी असे वेगवेगळ्या टप्प्यांवरचे टॅरंटुला सापडले. हे कोळी पेरूच्या वेगवेगळ्या भागांतून गोळा केले असल्याचं समजतं.

या घटनेमुळे बेकायदेशीर वन्यजीव तस्करीच्या काळ्या बाजाराकडे पुन्हा एकदा लक्ष वेधलं गेलं आहे. यात पैशांसाठी दुर्मिळ प्राण्यांना पकडून आंतरराष्ट्रीय सीमांच्या पलीकडे नेलं जातं.

आरोपी ताब्यात, वन्यजीव तस्करीची जगभरात चिंता

या तस्करीमध्ये सामील असल्याच्या संशयावरून पर्यावरण गुन्ह्यांच्या विशेष पोलीस अधिकाऱ्यांनी तीन युरोपियन नागरिकांना ताब्यात घेतलं आहे. या तस्करीच्या प्रयत्नाबद्दल त्यांच्यावर फौजदारी कारवाई केली जाईल, असं SERFOR ने स्पष्ट केलं आहे.

बेकायदेशीर वन्यजीव तस्करी ही आंतरराष्ट्रीय पातळीवरची एक मोठी समस्या बनली आहे. इंटरपोलच्या माहितीनुसार, जगभरात या गुन्हेगारी व्यापारातून दरवर्षी सुमारे २० अब्ज डॉलर्सची उलाढाल होते.

या बेकायदेशीर व्यापारामुळे प्राण्यांच्या प्रजाती धोक्यात तर येतातच, पण जैवविविधतेचंही मोठं नुकसान होतं. लिमा विमानतळावरच्या या कारवाईवरून हे स्पष्ट होतं की, तस्कर संरक्षित वन्यजीवांना लपवण्यासाठी आणि सीमा ओलांडण्यासाठी किती विचित्र पद्धतींचा वापर करतात.