Pakistan Blast: पाकिस्तानमध्ये भर बाजारात भीषण स्फोट, ९ ठार, ३० हून अधिक जखमी; मृतांचा आकडा वाढण्याची भीती

पाकिस्तानच्या नौरंग बाजारात झालेल्या भीषण स्फोटात ९ जणांचा मृत्यू झाला असून, ३० हून अधिक जण जखमी झाले आहेत. स्फोटानंतर बाजारात एकच गोंधळ उडाला. सुरक्षा यंत्रणांनी या प्रकरणाचा तपास सुरू केला आहे.

Suicide Blast In Pakistan: पाकिस्तान पुन्हा एकदा दहशतवाद आणि हिंसाचाराच्या आगीत होरपळत आहे. वायव्य पाकिस्तानमधील एका गजबजलेल्या बाजारात झालेल्या भीषण स्फोटानं संपूर्ण परिसर हादरला आहे. हा स्फोट इतका शक्तिशाली होता की, बाजारातील अनेक दुकानं जमीनदोस्त झाली, रस्त्यावर ढिगारा पसरला आणि आसपासच्या गाड्यांचा चक्काचूर झाला. या घटनेत किमान ९ जणांचा मृत्यू झाला असून, ३० हून अधिक जण जखमी झाल्याची माहिती आहे. अनेक जखमींची प्रकृती गंभीर असल्यानं मृतांचा आकडा वाढण्याची भीती व्यक्त केली जात आहे.

गजबजलेल्या बाजारात उडाला हाहाकार

मिळालेल्या माहितीनुसार, हा स्फोट पाकिस्तानच्या वायव्य भागातील नौरंग बाजार (Naurang Bazar) परिसरात झाला. घटनेच्या वेळी बाजारात मोठी गर्दी होती. अचानक झालेल्या स्फोटामुळे परिसरात एकच गोंधळ उडाला. लोक आपला जीव वाचवण्यासाठी सैरावैरा धावू लागले. स्फोटानंतर सगळीकडे धूर, किंकाळ्या आणि चेंगराचेंगरीसारखी परिस्थिती निर्माण झाली होती. घटनेची माहिती मिळताच बचाव पथक आणि सुरक्षा यंत्रणा घटनास्थळी दाखल झाल्या. मदत आणि बचावकार्य तातडीने सुरू करण्यात आलं. अनेक जखमींना ढिगाऱ्याखालून आणि उद्ध्वस्त झालेल्या दुकानांमधून बाहेर काढण्यात आलं.

३० हून अधिक जखमी, अनेकांची प्रकृती नाजूक

पाकिस्तानची आपत्कालीन सेवा एजन्सी 'रेस्क्यू 1122' (Rescue 1122) नुसार, या स्फोटात सुमारे ३० जण जखमी झाले आहेत. त्यापैकी अनेकांची प्रकृती अत्यंत गंभीर असल्याचं सांगण्यात येत आहे. गंभीर जखमींना उपचारासाठी बन्नू येथील रुग्णालयांमध्ये हलवण्यात आलं आहे. THQ रुग्णालयाचे वैद्यकीय अधीक्षक मोहम्मद इशाक यांनी सांगितलं की, रुग्णालयात आतापर्यंत ३७ जखमी दाखल झाले आहेत. डॉक्टरांची टीम जखमींवर उपचार करण्यासाठी शर्थीचे प्रयत्न करत आहे.

अलिकडच्या काळात दहशतवादी हल्ले वाढले

पाकिस्तानमध्ये आधीच दहशतवादी घटनांनी थैमान घातलेलं असताना हा स्फोट झाला आहे. काही दिवसांपूर्वीच बन्नू जिल्ह्यात एका पोलीस चौकीवर मोठा हल्ला झाला होता. त्या हल्ल्यात कार बॉम्बस्फोट आणि दबा धरून केलेल्या हल्ल्यात १५ पोलीस कर्मचाऱ्यांचा मृत्यू झाला होता. पाकिस्तान सरकारने या हल्ल्यांसाठी अफगाणिस्तानात सक्रिय असलेल्या दहशतवाद्यांना जबाबदार धरलं आहे. इस्लामाबादने या प्रकरणी तालिबान सरकारकडे तीव्र निषेधही नोंदवला होता.

अफगाणिस्तान आणि पाकिस्तानच्या संबंधात तणाव

मात्र, अफगाणिस्तानच्या तालिबान सरकारने पाकिस्तानचे आरोप फेटाळून लावले आहेत. पाकिस्तानमधील वाढत्या दहशतवादी घटना हा त्यांचा अंतर्गत प्रश्न असून अफगाणिस्तान कोणत्याही दहशतवादी संघटनेला पाठिंबा देत नाही, असं तालिबान प्रशासनाचं म्हणणं आहे. गेल्या काही महिन्यांपासून दोन्ही देशांमधील तणाव सातत्याने वाढत आहे. याच वर्षी पाकिस्तानने अफगाणिस्तानमध्ये एअरस्ट्राइकही केली होती. तिथे दहशतवादी तळ उद्ध्वस्त केल्याचा दावा पाकिस्तानने केला होता.

अद्याप कोणत्याही संघटनेनं जबाबदारी स्वीकारली नाही

मंगळवारी झालेल्या या बाजारपेठेतील स्फोटाची जबाबदारी अद्याप कोणत्याही दहशतवादी संघटनेने स्वीकारलेली नाही. सुरक्षा यंत्रणांनी संपूर्ण परिसराला वेढा घातला असून स्फोटाच्या कारणांचा तपास सुरू केला आहे. पाकिस्तानमधील वाढती अस्थिरता आणि सीमावर्ती भागातील सक्रिय दहशतवादी गट येत्या काळात सुरक्षा यंत्रणांसाठी मोठं आव्हान ठरू शकतात, असं तज्ज्ञांचं मत आहे.