इम्रान खान भारत-पाकमधील संघर्ष संपवू शकतात, त्यांना तुरुंगातून सोडण्याची समर्थकांची मागणी

पाकिस्तानचे माजी पंतप्रधान इम्रान खान यांना तुरुंगातून सोडण्याची मागणी त्यांच्या समर्थकांनी केली आहे.

पाकिस्तानचे माजी पंतप्रधान इम्रान खान यांना भ्रष्टाचाराच्या खटल्यात १४ वर्षांची शिक्षा सुनावण्यात आली आहे. ५ ऑगस्ट २०२३ रोजी त्यांना तीन वर्षांची शिक्षा सुनावण्यात आली होती, त्यानंतर सरकारी गुपिते उघड केल्याबद्दल १४ वर्षांची शिक्षा सुनावण्यात आली. सरकारी गुपिते उघड करणे, सरकारी भेटवस्तू विकणे अशा १०० हून अधिक प्रकरणांमध्ये त्यांच्यावर आरोप आहेत.

यानंतर, पहलगाम हल्ल्यानंतर दहशतवाद्यांना नष्ट केल्यानंतर भारत पाकिस्तानवर अनावश्यक हल्ले करत आहे. निष्पाप लोकांना मारत आहे. याला आपला सैन्य जोरदार प्रत्युत्तर देत असल्याने पाकिस्तान ते सहन करू शकत नाही. भारताच्या हल्ल्यात पाकिस्तानातील अनेक शहरे उद्ध्वस्त झाली आहेत. पाकिस्तानचे पंतप्रधान शेहबाज शरीफ कुठे लपले आहेत हेच कळत नाही.

स्वार्थासाठी भारताशी युद्ध करून देशाला विनाशाकडे नेल्याबद्दल पाकिस्तानचे लष्करप्रमुख जनरल असीम मुनीर यांच्यावर पाकिस्तानी जनता टीका करत आहे. या परिस्थितीत, पाकिस्तानला वाचवण्यासाठी फक्त इम्रान खानच मदत करू शकतात. त्यांना तुरुंगातून सोडण्यासाठी पाकिस्तान सरकारविरोधात त्यांचे समर्थक आंदोलन करत आहेत.

नेटकऱ्यांसह इम्रान खान यांच्या समर्थकांनी त्यांची सुटका करण्याची मागणी केली आहे. "या तणावाच्या काळात पाकिस्तानला मदत करू शकणारे एकमेव राजकारणी इम्रान खान आहेत," असे ते म्हणतात. "पाकिस्तानची खरी शक्ती आणि आवाज पुन्हा सक्रिय करा. पाकिस्तानला इम्रान खानची गरज आहे," असे काही नेटकरी म्हणाले आहेत.

"इम्रान खान आता काळाची गरज आहेत. एक माणूस. एक राष्ट्र. एक आवाज," असे काही जण म्हणाले आहेत. "तुमचा अहंकार सोडा. इम्रान खानशी बोला. त्यांना बाहेर काढा. या संकटाला कसे तोंड द्यायचे याबाबत तुम्हाला सल्ला देण्यासाठी त्यांना बाहेर आणा. कारण कठीण निर्णय घेण्याचे धाडस तुमच्यात नाही," असे इम्रान खान यांच्या समर्थकांनी पाकिस्तानचे पंतप्रधान शेहबाज शरीफ यांना सांगितले आहे. तसेच, इम्रान खान ज्या तुरुंगात आहेत त्यावर भारत हल्ला करू शकतो, म्हणून त्यांना सोडण्यात यावे, अशी याचिकाही न्यायालयात दाखल करण्यात आली आहे.