Manchester United: चॅम्पियन्स लीगमध्ये मँचेस्टर युनायटेडचा दणदणीत कमबॅक, १९ वर्षांच्या पोराने फिरवला सामना
सार
सलग नऊ सामन्यांत विजय न मिळाल्याने मँचेस्टर युनायटेडचा आत्मविश्वास डळमळीत झाला होता. पण युएईफा चॅम्पियन्स लीगमध्ये एएस रोमाविरुद्ध मिळवलेला विजय त्यांच्यासाठी मोठा दिलासा ठरला आहे.
लंडन: सलग नऊ सामन्यांत विजयाची चव न चाखल्याने मँचेस्टर युनायटेडचा संघ चांगलाच दबावात होता. पण युएईफा चॅम्पियन्स लीगमध्ये एएस रोमाला हरवून त्यांनी जोरदार कमबॅक केलंय. ओल्ड ट्रॅफर्डवर झालेल्या या सामन्यात सुरुवातीला मँचेस्टर युनायटेड नेहमीप्रमाणेच बॅकफूटवर दिसत होतं. पहिल्या हाफमध्येच रोमाच्या संघाने दोन गोल मारून आघाडी घेतली होती. पण दुसऱ्या हाफमध्ये युनायटेडच्या पोरांनी तीन गोल ठोकत रोमाचा करेक्ट कार्यक्रम केला.
या सामन्यात दोन गोल मारणाऱ्या मॅथ्यूस कुन्हाने शेवटच्या मिनिटाला रेड कार्ड खाल्लं, ज्यामुळे सामन्यात चांगलीच नाट्यमय घडामोड पाहायला मिळाली. पण या विजयाचा खरा हिरो ठरला तो १९ वर्षांचा शी लासे (Shea Lacey). ७५ व्या मिनिटाला अमाद डायलोच्या जागी तो मैदानात उतरला. फक्त १५ मिनिटं खेळून या पठ्ठ्याने सामन्याचं चित्रच पालटून टाकलं. त्यानेच कुन्हाच्या विजयी गोलसाठी भारी असिस्ट दिला. पहिल्या हाफमध्ये रोमाकडून मथियास सुले आणि डोनिएल मालेन यांनी गोल करत संघाला २-० अशी आघाडी मिळवून दिली होती. पण दुसऱ्या हाफमध्ये ब्रुनो फर्नांडिसने पेनल्टीवर गोल करत युनायटेडला सामन्यात परत आणलं. त्यानंतर मॅथ्यूस कुन्हाने दोन गोल मारत मँचेस्टर युनायटेडची ओल्ड ट्रॅफर्डवरची इज्जत वाचवली.
मँचेस्टरचे कोच मायकेल कॅरिक यांच्यासाठी पहिल्या हाफची सुरुवात एकदमच निराशाजनक होती. युनायटेडच्या संघाला एकही शॉट टार्गेटवर मारता आला नव्हता. हॅमस्ट्रिंग इंज्युरीमुळे कार्लोस बालेबाला मैदान सोडावं लागलं आणि त्याच्या जागी युरी टिलेमन्स आला. इथूनच मँचेस्टरच्या खेळात बदल दिसायला लागला. कुन्हाला पाडल्यामुळे रेड डेव्हिल्सच्या संघाला पेनल्टी मिळाली आणि तीच त्यांच्यासाठी टर्निंग पॉईंट ठरली. ब्रुनोने पेनल्टी घेतली, पण ती हुकली. नशीब चांगलं म्हणून रोमाचे खेळाडू आधीच बॉक्समध्ये घुसल्याने रेफ्रींनी पुन्हा पेनल्टी घ्यायला सांगितली. यावेळी मात्र ब्रुनोने कोणतीही चूक न करता गोल मारला आणि कमबॅकची सुरुवात केली. शी लासे मैदानात आल्यावर युनायटेडला गोल करण्याच्या भरपूर संधी मिळाल्या. कोच मायकेल कॅरिकने या युवा खेळाडूचं खास कौतुक केलंय. आता युनायटेडच्या फॅन्सनी शी लासेला स्टार्टिंग लाईनअपमध्ये जागा देण्याची मागणी लावून धरली आहे. 'अ सिरियस टॅलेंट' (A serious talent) अशा शब्दांत फॅन्स या १९ वर्षांच्या पोराचं कौतुक करत आहेत.