3D Printing: कॉफी ग्राइंडरचं झाकण हरवलं, पठ्ठ्याने AI कडून मिनिटांत बनवून घेतलं!

ऑस्टिन पीटरस्मिथ नावाच्या एका व्यक्तीची सोशल मीडिया पोस्ट सध्या खूप चर्चेत आहे. त्याने आपल्या कॉफी ग्राइंडरचं हरवलेलं झाकण AI च्या मदतीने पुन्हा डिझाइन करून घेतलं. विशेष म्हणजे, यासाठी त्याला स्वतः कोणतंही CAD मॉडेल बनवावं लागलं नाही.

ऑस्टिन पीटरस्मिथ नावाच्या एका व्यक्तीची सोशल मीडिया पोस्ट सध्या खूप व्हायरल झाली आहे. ऑस्टिन हा 'हावी' (Howie) नावाच्या AI-पॉवर्ड कॅलेंडर सेक्रेटरी कंपनीचा सह-संस्थापक आणि सीईओ आहे. त्याने त्याच्या कॉफी ग्राइंडरचं हरवलेलं झाकण AI च्या मदतीने कसं बनवलं, हे या पोस्टमध्ये सांगितलं आहे. यासाठी त्याला स्वतःला कोणतंही CAD मॉडेल बनवण्याची गरज पडली नाही. एखाद्या वस्तूचा पार्ट बनवण्यासाठी त्याचं इंच-इंच मोजमाप घेणं किंवा तासन्तास त्याचं डिझाइन तयार करत बसण्याऐवजी, पीटरस्मिथने फक्त त्याला काय हवं आहे हे AI ला टेक्स्ट मेसेजमध्ये सांगितलं. त्यानंतर AI ने स्वतःच त्या प्रोडक्टबद्दल रिसर्च केला, त्याचे योग्य माप शोधून काढले आणि प्रिंट करण्यासाठी तयार असलेली एक 3D फाईल बनवून दिली. आश्चर्याची गोष्ट म्हणजे, पहिल्याच प्रयत्नात ते झाकण अगदी व्यवस्थित बसलं.

पीटरस्मिथ म्हणाला, "माझ्या कॉफी ग्राइंडरचं झाकण हरवलं होतं. कोडेक्स (Codex) नावाच्या AI ने तो पार्ट शोधला, त्याची मापं काढली आणि मला एक 3D प्रिंट फाईल बनवून दिली, जी पहिल्याच प्रयत्नात अगदी परफेक्ट बसली."

त्याने AI ला दिलेला प्रॉम्प्ट (सूचना) किती सोपा होता, याचा स्क्रीनशॉटही शेअर केला आहे.

"माझ्या 2012 च्या Baratza Encore कॉफी ग्राइंडरसाठी हॉपरचं झाकण बदलण्याकरिता एक CAD डिझाइन बनव. त्यासाठी लागणारी सगळी माहिती तू स्वतःच शोध आणि डिझाइन कर. हे पहिल्याच प्रयत्नात परफेक्ट व्हायला हवं," असं पीटरस्मिथने लिहिलं होतं.

i lost the lid to my coffee grinder and codex tracked down the part, found the dimensions, and made me a 3d print file that fit perfectly in one shot pic.twitter.com/KIYYk0RDce

— austin petersmith (@awwstn) August 3, 2026

जवळपास २० मिनिटं काम केल्यानंतर, कोडेक्सने अचूक मापांसह CAD फाईल्स तयार केल्या, ज्या पीटरस्मिथ थेट 3D प्रिंटिंगसाठी पाठवू शकला.

"झालं. मी Baratza च्या मूळ 6010/सध्याच्या 1010 लिड फॅमिली आणि मोजलेल्या स्टॉक-हॉपरच्या आधारावर एक टॉलरन्स-फ्रेंडली, सेल्फ-सेंटरिंग झाकण तयार केलं आहे," असं AI ने सांगितलं.

हे इतकं अचूक कसं जमलं, असं विचारल्यावर कोडेक्सने स्पष्ट केलं की, त्याने आधी Baratza च्या 2012 च्या पार्ट्स कॅटलॉगचा अभ्यास करून मूळ पार्ट ओळखला. त्यानंतर, ऑफिशियल प्रोडक्ट फोटोंची ग्राइंडरच्या माहिती असलेल्या मापांशी तुलना केली आणि बाजारात उपलब्ध असलेल्या इतर प्रिंटेड अ‍ॅक्सेसरीजचं विश्लेषण करून अचूक माप निश्चित केलं.

पीटरस्मिथच्या या प्रयोगानंतर सोशल मीडियावर मोठी चर्चा सुरू झाली. अनेक युजर्सनी याला 'कन्झ्युमर 3D प्रिंटिंग'मधील एक मोठा टर्निंग पॉईंट म्हटलं आहे. अनेकांच्या मते, AI मुळे या टेक्नॉलॉजीमधील सर्वात मोठा अडथळा, म्हणजेच क्लिष्ट CAD मॉडेल्स बनवण्याची गरज, आता दूर होऊ शकते. यामुळे सामान्य माणसालाही हवी ती वस्तू घरच्या घरी बनवणं शक्य होईल.

एका युझरने लिहिलं, "माझा व्हॅक्युम क्लिनरच्या एका पार्टसोबत असाच अनुभव होता. मी तर हैराणच झालो." तर दुसऱ्याने विचारलं, "आता अशा गोष्टी शक्य झाल्यामुळे 3D प्रिंटिंगचं युग पुन्हा येणार का?"

तिसऱ्या युझरने कमेंट केली, “सर्वसामान्य माणसासाठी 3D प्रिंटिंग उपयुक्त बनवणारी हीच खरी क्रांती आहे. तुम्हाला काय हवंय हे फक्त सांगा आणि ती वस्तू तयार होईल.”

या व्हायरल झालेल्या घटनेमुळे आता अशी शक्यता वर्तवली जात आहे की, AI मुळे 3D प्रिंटिंग खूप सोपं होऊ शकतं. किचकट तांत्रिक डिझाइनऐवजी फक्त बोलून किंवा लिहून हव्या त्या वस्तू बनवता येतील. यामुळे लाखो लोकांसाठी पर्सनलाइज्ड मॅन्युफॅक्चरिंग सहज शक्य होईल.