"लाहोर हादरलं! लष्करप्रमुख व पंतप्रधानांच्या घराजवळ स्फोट"

पाकिस्तानातील लाहोर शहरात लष्करप्रमुख जनरल असीम मुनीर आणि पंतप्रधान शेहबाज शरीफ यांच्या निवासस्थानाजवळ भीषण स्फोट झाले आहेत. या घटनेमुळे पाकिस्तानच्या अंतर्गत सुरक्षेबाबत प्रश्न उपस्थित झाले आहेत.

लाहोर | प्रतिनिधी - पाकिस्तानातील लाहोर शहर पुन्हा एकदा भीतीच्या छायेत झाकलं गेलं आहे. विशेष म्हणजे हे स्फोट कुठेही नाही, तर थेट लष्करप्रमुख जनरल असीम मुनीर आणि पंतप्रधान शेहबाज शरीफ यांच्या अधिकृत निवासस्थानांच्या काही मीटर अंतरावर झाले. वॉल्टन विमानतळ आणि लष्करी छावणी क्षेत्राजवळ एकामागोमाग एक झालेल्या या स्फोटांनी पाकिस्तानच्या अंतर्गत सुरक्षेबाबत गंभीर प्रश्न उपस्थित केले आहेत.

या घटनेमुळे संपूर्ण देशात खळबळ उडाली आहे. पाकिस्तानातील सुरक्षा व्यवस्था इतक्या संवेदनशील भागात स्फोट रोखू शकत नसेल, तर सामान्य जनतेच्या सुरक्षेचं काय, असा सवाल उपस्थित होत आहे.

या स्फोटांची वेळही संशयास्पद आहे. नुकत्याच पार पडलेल्या भारताच्या ‘ऑपरेशन सिंदूर’ मोहिमेमुळे भारत-पाकिस्तान संबंध पुन्हा एकदा तणावपूर्ण झाले आहेत. या पार्श्वभूमीवर लाहोरसारख्या शहरात, विशेषतः सैन्याच्या मुख्य भागात स्फोट होणं, हे सहज घडलेलं अपघात नाही, असं तज्ज्ञांचं म्हणणं आहे.

अधिकार्‍यांनी अजूनपर्यंत कोणताही स्पष्ट अधिकृत निष्कर्ष जाहीर केलेला नाही. मात्र, सामाजिक माध्यमांवर नागरिक आणि पत्रकारांकडून “हे स्फोट आकस्मिक की नियोजित?” असा थेट सवाल केला जात आहे.