Strongest Currency : जगातील सर्वात शक्तिशाली चलन, अमेरिकन डॉलरही पडतो फिका

जगातील सर्वात शक्तिशाली चलन म्हटले की सर्वांना अमेरिकन डॉलर आठवतो. पण डॉलरपेक्षाही मूल्यवान चलन वेगळेच आहे. त्यामुळेच अनेकजण त्या देशात नोकरीसाठी जाण्यास पसंती देतात.

जगातील सर्वात मूल्यवान चलन

जगातील सर्वात मौल्यवान चलन म्हटले की अनेकांना अमेरिकन डॉलर किंवा ब्रिटिश पाऊंड आठवतो. आंतरराष्ट्रीय बाजारात अमेरिकन डॉलरचा सर्वाधिक वापर होत असला तरी, मूल्याच्या बाबतीत तो पहिल्या स्थानावर नाही. पश्चिम आशियाई देश कुवेतचे चलन 'दिनार' हे जगातील सर्वात शक्तिशाली चलन म्हणून पहिल्या स्थानावर आहे. फक्त एक कुवेती दिनार खरेदी करण्यासाठी तीन डॉलर्सपेक्षा जास्त खर्च करावे लागतात. शक्तिशाली डॉलर आणि युरोसारख्या पाश्चात्य चलनांपेक्षाही कुवेती दिनारचे मूल्य जास्त आहे. भारतीय रुपयात सांगायचे तर एका कुवेती दिनारची किंमत ३०० रुपये आहे, तर अमेरिकन डॉलरची किंमत फक्त ९३ रुपये आहे.

एवढे मूल्य का?

कुवेती दिनारला एवढे महत्त्व मिळण्याचे मुख्य कारण म्हणजे त्या देशातील कच्च्या तेलाचा प्रचंड साठा. जगातील सर्वात मोठ्या तेल निर्यातदारांपैकी एक म्हणून ओळखल्या जाणाऱ्या कुवेतने आपली अर्थव्यवस्था भक्कम ठेवली आहे. येथील करमुक्त धोरणे आणि मजबूत परकीय गंगाजळी स्थानिक चलनाची स्थिरता वाढवतात. केवळ कुवेतच नव्हे तर बहरीन दिनार, ओमान रियाल आणि जॉर्डन दिनार यांसारख्या इतर आखाती देशांची चलने देखील जागतिक यादीत सर्वोच्च स्थानावर आहेत आणि पाश्चात्य चलनांना कडवी स्पर्धा देत आहेत.

दिनारचे वर्चस्व

आंतरराष्ट्रीय व्यापार, गुंतवणूक आणि परदेश प्रवासात जरी डॉलरचा दबदबा दिसत असला तरी, एका युनिटच्या मूल्याचा विचार केला तर दिनारचे मूल्य जास्त आहे. स्विस फ्रँक, केमन आयलंड डॉलर आणि ब्रिटिश पाऊंड ही चलने डॉलरच्या पुढे आहेत. जागतिक अर्थव्यवस्थेत बदल होत असले तरी, कुवेती दिनारने अनेक दशकांपासून आपले वर्चस्व कायम राखले आहे आणि जगातील सर्वात महागडे चलन म्हणून आपला विक्रम अबाधित ठेवला आहे.