King Cobra : टॉयलेट ब्लॉक झालं वाटलं, फ्लश करताच बाहेर आला किंग कोब्रा! पाहा व्हिडिओ
सार
Viral Video : फिलीपिन्समध्ये सुट्टीसाठी गेलेल्या काही मित्रांना हॉटेलच्या टॉयलेटमध्ये एक भयानक धक्का बसला. त्यांना वाटलं टॉयलेट चोकअप झालंय, पण फ्लश केल्यावर आतून एक भलामोठा किंग कोब्रा बाहेर आला. या घटनेचा व्हिडिओ व्हायरल झाला असून स्थानिक प्रशासन आता या प्रकरणाची चौकशी करत आहे.
Viral Video : फिलीपिन्समध्ये सुट्टी एन्जॉय करायला गेलेल्या मित्रांच्या ग्रुपसोबत एक भयंकर प्रकार घडला. त्यांच्या हॉटेलच्या टॉयलेटमध्ये चक्क एक किंग कोब्रा लपून बसला होता. 'द सन'च्या वृत्तानुसार, ही घटना फिलीपिन्सच्या नॉर्दर्न नेग्रोस नॅचरल पार्कमधील साल्वाडोर बेनेडिक्टो येथील एका रिसॉर्टमध्ये घडली. हॉटेलमध्ये थांबलेल्या पाच मित्रांपैकी एक जण बाथरूममध्ये गेला, तेव्हा त्याला टॉयलेटच्या भांड्यात काहीतरी विचित्र दिसलं. पाण्यात काहीतरी काळपट पदार्थ दिसल्याने, आधी त्याला वाटलं की टॉयलेट नीट फ्लश केलेलं नाही. पण जेव्हा त्याने पुन्हा एकदा फ्लश केलं, तेव्हा टॉयलेटच्या पाईपमधून थेट सापाचं डोकं वर आलं, हे पाहून सगळ्यांचीच भीतीने गाळण उडाली.
या घटनेचा एक व्हायरल झालेला व्हिडिओ समोर आला आहे. यात एक जण टॉयलेटचं झाकण हळूच उघडून एका लांब काठीने त्या सापाला हलवून पाहताना दिसतोय. त्यानंतर तो साप बाहेर सरपटत येतो आणि कॅमेराकडे पाहून जीभ बाहेर काढताना दिसतो.
ड्रानरेब टिओडोसो नावाच्या एका पर्यटकाने 'द सन'ला सांगितलं की, सुरुवातीला त्यांच्या मित्राने हे सांगितल्यावर ग्रुपमधील कोणाचाच विश्वास बसला नाही. म्हणून तो स्वतः टॉयलेट तपासण्यासाठी धावला. हॉटेल कर्मचाऱ्यांना बोलवण्याआधी, तो साप जिवंत आहे की नाही हे पाहण्यासाठी त्याने एका काठीने त्याला तपासून पाहिलं.
व्हायरल व्हिडिओ पाहा
सुरुवातीला या ग्रुपला वाटलं की हा एक साधा पाणसाप (water snake) असेल. पण जेव्हा या घटनेचा व्हिडिओ ऑनलाइन पोस्ट करण्यात आला, तेव्हा सर्पमित्रांनी (reptile aficionados) हा जगातल्या सर्वात विषारी सापांपैकी एक असलेला किंग कोब्रा असल्याचं सांगितलं.
स्थानिक अधिकाऱ्यांनी 'द सन'ला माहिती दिली की, साल्वाडोर बेनेडिक्टोमध्ये याआधीही किंग कोब्रा दिसल्याच्या घटना घडल्या आहेत. सुपरिंटेंडेंट जीना गेरांगया यांच्या म्हणण्यानुसार, हा साप बेकायदेशीरपणे पाळला गेला होता आणि तिथून पळून आला असावा का, या शक्यतेचीही तपासणी केली जात आहे.
त्या भागात सध्या प्रचंड उष्णता आहे, त्यामुळे थंडावा शोधण्यासाठी हा साप तिथे आला असावा, असाही एक अंदाज अधिकाऱ्यांनी व्यक्त केला आहे. सध्या प्रशासन या संपूर्ण प्रकरणाची चौकशी करत आहे.