कॅश पटेल: FBI प्रमुखपदी विराजमान

भारतीय वंशाचे कॅश पटेल यांनी अमेरिकेत FBI चे संचालक म्हणून पदभार स्वीकारला आहे. त्यांनी भगवद्गीतेवर हात ठेवून शपथ घेतली आणि राष्ट्राध्यक्ष ट्रम्प यांनी दिलेल्या संधीबद्दल आभार मानले.

वॉशिंग्टन: अमेरिकेत फेडरल ब्युरो ऑफ इन्व्हेस्टिगेशन - एफबीआयचे नवे संचालक म्हणून भारतीय वंशाचे कॅश पटेल यांनी पदभार स्वीकारला. भगवद्गीतेवर हात ठेवून कॅश पटेल यांनी शपथ घेतली. वॉशिंग्टनमध्ये हा शपथविधी सोहळा पार पडला. बहीण आणि पत्नीसह कॅश पटेल सोहळ्याला उपस्थित होते. आयुष्यातील सर्वात मोठे भाग्य असल्याचे त्यांनी म्हटले आहे. राष्ट्राध्यक्ष डोनाल्ड ट्रम्प यांनी दिलेल्या संधीबद्दल कॅश पटेल यांनी त्यांचे आभार मानले. 

सामान्य घरातून आलेल्या एका भारतीय तरुणाला इतक्या मोठ्या पदावर पोहोचता आले हे अमेरिकेत मिळणाऱ्या संधीचे प्रतीक असल्याचे त्यांनी सांगितले. ३८००० कर्मचारी आणि ११ अब्ज डॉलर्स वार्षिक खर्चाची जगप्रसिद्ध गुप्तचर संस्था आता कॅश पटेल यांच्या नेतृत्वाखाली असेल. कॅश पटेल म्हणून ओळखले जात असले तरी त्यांचे खरे नाव कश्यप पटेल आहे. कॅनडा मार्गे अमेरिकेत स्थलांतरित झालेले गुजराती वंशाचे कुटुंब आहे. २५ फेब्रुवारी १९८० रोजी न्यूयॉर्कमधील गार्डन सिटी येथे जन्मलेल्या कॅश यांनी रिचमंड विद्यापीठातून पदवीचे शिक्षण पूर्ण केले. लंडनमधील युनिव्हर्सिटी कॉलेजमधून आंतरराष्ट्रीय नियमांमध्ये पदव्युत्तर पदवीही मिळवली.

ट्रम्प यांच्या सर्वात विश्वासू व्यक्तींपैकी एक म्हणून कॅश पटेल ओळखले जातात. उत्तम वकील, गुप्तहेर आणि अमेरिकेचे पहिले योद्धा म्हणूनही त्यांची ओळख आहे. भ्रष्टाचार उघड करण्यासाठी, न्याय राखण्यासाठी आणि अमेरिकन जनतेचे रक्षण करण्यासाठी त्यांनी आपले आयुष्य समर्पित केले आहे, अशी प्रशंसा ट्रम्प यांनी पूर्वी कॅशबद्दल केली होती.