Iran-Israel Conflict : इराणचा थेट इस्रायलवर बॅलिस्टिक मिसाइल हल्ला, दोघांचा मृत्यू; अमेरिकेचीही मोठी कारवाई

Iran-Israel Conflict : इराणने इस्रायलवर केलेल्या बॅलिस्टिक मिसाइल हल्ल्यात दोन जणांचा मृत्यू झाला आहे. रामात गान शहरात ही घटना घडली असून मृतांमध्ये एक पुरुष आणि एका महिलेचा समावेश आहे. दुसरीकडे, अमेरिकेने 'ऑपरेशन एपिक फ्युरी' सुरू करत इराणच्या लष्करी ठिकाणांवर हल्ले केले आहेत.

Iran-Israel Conflict : इराणने केलेल्या बॅलिस्टिक मिसाइल हल्ल्यात मध्य इस्रायलमध्ये दोन जणांचा मृत्यू झाला आहे. इस्रायलची आपत्कालीन वैद्यकीय सेवा असलेल्या मॅगेन डेव्हिड अॅडोम (MDA) ने सीएनएनला ही माहिती दिली.

एमडीएच्या पॅरामेडिक्सची टीम रामात गान शहरात घटनास्थळी पोहोचली. तिथे मिसाइलचे छर्रे लागल्याने गंभीर जखमी झालेल्या एका पुरुषाला आणि एका महिलेला त्यांनी मृत घोषित केलं. याशिवाय, तेल अवीवच्या उत्तरेला असलेल्या बेनी ब्राक शहरातही मिसाइलचे काही अवशेष पडले. यात एक व्यक्ती किरकोळ जखमी झाल्याची माहिती एमडीएने दिली आहे.

होम फ्रंट कमांडकडून नागरिकांना सूचना

दरम्यान, इस्रायलच्या होम फ्रंट कमांडने नागरिकांसाठी महत्त्वाची सूचना जारी केली आहे. सध्याच्या परिस्थितीत प्रशासनाकडून मिळणारे सर्व अलर्ट आणि सूचना जीव वाचवणाऱ्या ठरत आहेत, त्यामुळे त्यांचं पालन करावं, असं आवाहन करण्यात आलं आहे.

इस्रायल डिफेन्स फोर्सेसने (IDF) एक्सवर (पूर्वीचं ट्विटर) पोस्ट करत म्हटलं, “देशाच्या मध्य भागात जिथे हल्ल्याची माहिती मिळाली, तिथे होम फ्रंट कमांडची पथकं तातडीने पोहोचली आहेत. बचाव पथकं घटनास्थळी नागरिकांना मदत करत आहेत. नागरिकांनी सूचनांचं पालन करत राहावं.”

काही वेळाने, होम फ्रंट कमांडने नागरिकांना सुरक्षित जागांमधून बाहेर पडण्याची परवानगी दिली, पण त्याचवेळी सतर्क राहण्यास आणि अधिकृत सुरक्षा निर्देशांचे पालन करण्यास सांगितलं. IDF ने दुसऱ्या एका पोस्टमध्ये लिहिलं, “परिस्थितीचा आढावा घेतल्यानंतर, होम फ्रंट कमांडने नागरिकांना सुरक्षित जागेतून बाहेर पडण्याची परवानगी दिली आहे. बचाव पथकं देशभरात अनेक ठिकाणी कार्यरत आहेत. अशा ठिकाणी गर्दी करणं टाळावं. कृपया होम फ्रंट कमांडच्या सूचनांचं पालन करत राहा.” होम फ्रंट कमांडने त्यांच्या पथकांच्या कारवाईचे काही अतिरिक्त फोटोही शेअर केले आहेत.

IDF कडून लेबनॉनमधील हिजबुल्लाहच्या तळांवर हल्ले

एकीकडे इराणने हल्ला केला असताना, इस्रायली लष्कराने (IDF) लेबनॉनमध्ये हिजबुल्लाहच्या रॉकेट लाँचर्स आणि दहशतवाद्यांवर हवाई हल्ले केले आहेत. 'ऑपरेशन रोअरिंग लायन' अंतर्गत ही कारवाई करण्यात येत असल्याचं लष्कराने मंगळवारी सांगितलं.

IDF ने एक्सवर पोस्ट केले, “गेल्या तासात हवाई दलाने लेबनॉनमध्ये हिजबुल्लाहचे लाँचर्स आणि दहशतवाद्यांवर हल्ले केले. रॉकेट डागण्यापूर्वी किंवा डागल्यानंतर लगेचच त्यांच्यावर कारवाई करण्यात आली.” या पोस्टमध्ये पुढे म्हटलं आहे, "'ऑपरेशन रोअरिंग लायन' सुरू झाल्यापासून, IDF ने इस्रायलच्या नागरिकांवरील धोका दूर करण्यासाठी लेबनॉनमधील हिजबुल्लाहच्या शेकडो रॉकेट लाँचर्सवर हल्ले केले आहेत."

अमेरिकेकडून इराणविरोधात 'ऑपरेशन एपिक फ्युरी' सुरू

दरम्यान, अमेरिकेच्या डिपार्टमेंट ऑफ वॉरने एक्सवर एक पोस्ट शेअर केली आहे. त्यात त्यांनी लिहिलं आहे, “आम्ही राष्ट्राध्यक्ष ट्रम्प यांच्या आदेशांचं वेगाने आणि अचूकपणे पालन करत आहोत. 'ऑपरेशन एपिक फ्युरी'ने इराणच्या लष्कराला उद्ध्वस्त केलं आहे.”

अमेरिकेच्या नौदलाचे अॅडमिरल आणि यूएस सेंट्रल कमांडचे कमांडर ब्रॅड कूपर यांनी एका व्हिडिओमध्ये म्हटलं, "आमची लष्करी उद्दिष्टं स्पष्ट आहेत. इराणची बॅलिस्टिक मिसाइल्स, ड्रोन्स आणि नौदल धोके नष्ट करणं हे आमचं ध्येय आहे. आजपर्यंत, आमच्या हवाई दल, नौदल आणि मरीन कॉर्प्सच्या पायलट्सनी मिळून ६,००० हून अधिक लढाऊ उड्डाणं केली आहेत."

अमेरिकेचा इराणच्या मिसाइल तळांवर मोठा हल्ला

अमेरिकेने इराणच्या किनारपट्टीवर असलेल्या 'हार्डन्ड' म्हणजेच मजबूत अशा मिसाइल तळांवर हल्ला केला आहे. यासाठी "अनेक ५,००० पाउंड (सुमारे २२६७ किलो) वजनाचे डीप पेनिट्रेटर बॉम्ब" वापरण्यात आले. हे तळ होर्मुझच्या सामुद्रधुनीजवळ होते. यू.एस. सेंट्रल कमांडने एक्सवर पोस्ट करत लिहिलं, “काही तासांपूर्वी, अमेरिकी दलांनी होर्मुझच्या सामुद्रधुनीजवळ इराणच्या किनारपट्टीवरील मजबूत मिसाइल तळांवर ५,००० पाउंड वजनाचे डीप पेनिट्रेटर बॉम्ब यशस्वीरित्या वापरले. या तळांवरील इराणची अँटी-शिप क्रूझ मिसाइल्स आंतरराष्ट्रीय जहाजांसाठी धोकादायक होती.”