भारतीय हवाई दलाचा हल्ला: पाकिस्तानातील ५ दहशतवादी ठार

भारतीय हवाई दलाच्या ७ मे रोजी पाकिस्तानातील दहशतवादी तळांवर केलेल्या कारवाईत लष्कर-ए-तोयबा आणि जैश-ए-मोहम्मदसारख्या संघटनांचे पाच कुख्यात दहशतवादी ठार झाल्याची माहिती सूत्रांनी दिली आहे. 

नवी दिल्ली – भारतीय हवाई दलाच्या ७ मे रोजी पाकिस्तानातील दहशतवादी तळांवर केलेल्या अचूक आणि ठोस कारवाईत लष्कर-ए-तोयबा आणि जैश-ए-मोहम्मदसारख्या संघटनांचे पाच कुख्यात दहशतवादी ठार झाल्याची माहिती सूत्रांनी दिली आहे. हे सर्व दहशतवादी भारतात घडवलेल्या अनेक हल्ल्यांमध्ये सहभागी होते.

विशेष म्हणजे, या दहशतवाद्यांच्या अंत्यसंस्कारांत पाक लष्कराच्या वरिष्ठ अधिकाऱ्यांची उपस्थिती दिसून आली. त्यामुळे पाकिस्तानातील ‘राजकीय-लष्करी-दहशतवादी’ युतीचा चेहरा पुन्हा एकदा जगासमोर उघड झाला आहे.

ठार करण्यात आलेले दहशतवादी कोण होते? 

मुदस्सर खडीयन खास उर्फ अबू जुंदाल (लष्कर-ए-तोयबा) – हाफिज सईदच्या जवळच्या सहयोगी अब्दुल रऊफच्या नेतृत्वाखाली त्याच्या अंत्यसंस्काराचे नमाज पठण करण्यात आले. एका सरकारी शाळेत अंत्यसंस्कार झाले आणि यावेळी पाक लष्कराचा एक सेवारत लेफ्टनंट जनरल व पंजाब पोलिसांचे आयजी देखील उपस्थित होते.

हाफिज मोहम्मद जमील (जैश-ए-मोहम्मद) – हा जैश संस्थापक मौलाना मसूद अझहरचा मोठा मेव्हणा होता. त्याच्या ठार होण्याने जैशला मोठा हादरा बसल्याचे मानले जाते.

मोहम्मद युसुफ अझहर उर्फ उस्तादजी (जैश-ए-मोहम्मद) – मसूद अझहरचा मेव्हणा आणि IC-814 विमान अपहरण प्रकरणातील मुख्य आरोपी. वर्षानुवर्षे भारताच्या यादीत सर्वात जास्त शोधात असलेला दहशतवादी.

खालिद उर्फ अबू अकाशा (लष्कर-ए-तोयबा) – जम्मू-कश्मीरमधील अनेक हल्ल्यांमध्ये सहभागी. अफगाणिस्तानहून शस्त्रांची तस्करी करणारा. त्याच्या अंत्यसंस्कारात फैसलाबादचे वरिष्ठ सैनिकी अधिकारी आणि जिल्हाधिकारी उपस्थित होते.

मोहम्मद हसन खान (जैश-ए-मोहम्मद) – पीओकेमधील जैशचा ऑपरेशनल कमांडर असलेल्या मुफ्ती असगर खान काश्मिरी याचा मुलगा. जम्मू-कश्मीरमधील दहशतवादी कारवायांचे समन्वयक म्हणून काम करत होता.

भारताच्या कारवाईमुळे पाकिस्तानच्या 'दहशतवादाच्या कमांड साखळीत' मोठी तुट पाकिस्तानने या हल्ल्यांवर अधिकृत मौन बाळगले असले, तरी त्यांच्या लष्कराच्या उपस्थितीने आणि अंत्यसंस्कारांच्या धार्मिक विधींनी, एक गोष्ट पुन्हा अधोरेखित झाली – की दहशतवाद्यांना पाकिस्तानात ‘राजकीय संरक्षण’ आणि ‘सैन्याची सहमती’ मिळते.