Hezbollah Attack US : इराणच्या बाजूने हिजबुल्लाहचा हल्ला, इस्रायलवर थेट मिसाइल डागले, युद्धाचा भडका उडणार?

Hezbollah Joins Iran Fires Missiles at Israel : अमेरिका आणि इस्रायलच्या हल्ल्यांदरम्यान आता इराणला हिजबुल्लाह या दहशतवादी संघटनेची साथ मिळाली आहे. हिजबुल्लाहने लेबनॉनमधून इस्रायलवर मिसाइल हल्ला केला.

Hezbollah Joins Iran Fires Missiles at Israel : अमेरिका आणि इस्रायलकडून सुरू असलेल्या हल्ल्यांमध्ये आता इराणला हिजबुल्लाह या संघटनेची साथ मिळाली आहे. इस्रायली लष्कराने दिलेल्या माहितीनुसार, लेबनॉनमधून त्यांच्यावर मिसाइल हल्ला झाला आहे. इराणच्या मीडियानेही हिजबुल्लाह आपल्यासोबत आल्याच्या वृत्ताला दुजोरा दिला आहे. IDF (इस्रायली लष्कर) च्या दाव्यानुसार, हिजबुल्लाहने रविवारी लेबनॉनमधून इस्रायलच्या दिशेने अनेक मिसाइल्स डागली.

गेल्या वर्षभरात इस्रायलच्या हल्ल्यांमुळे मोठं नुकसान सोसूनही हिजबुल्लाह अजूनही इराणच्या बाजूने उभा आहे. हिजबुल्लाहने या हल्ल्याची जबाबदारी स्वीकारली असून, इराणचे सर्वोच्च नेते अली खामेनी यांच्या हत्येचा हा बदला असल्याचं स्पष्ट केलं आहे. यानंतर आता इस्रायली लष्कराने बेरूतसह संपूर्ण लेबनॉनमध्ये प्रत्युत्तर देण्याचा इशारा दिला आहे.

उत्तर इस्रायलच्या अनेक भागांमध्ये सायरन वाजल्यानंतर, लेबनॉनमधून डागलेलं एक शस्त्र हवाई दलाने हवेतच नष्ट केलं, असं IDF ने एका निवेदनात म्हटलं आहे. काही मिसाइल्स मोकळ्या जागेत पडली. इस्रायलमध्ये कोणतीही जीवितहानी किंवा नुकसानीची माहिती नाही. IDF च्या प्रवक्त्याने सांगितलं की, लेबनॉनमधील हिजबुल्लाहच्या ठिकाणांवर हल्ले सुरू करण्यात आले आहेत. इराणसोबतच्या युद्धादरम्यान हिजबुल्लाहने हस्तक्षेप केल्यास जशास तसे उत्तर दिले जाईल, असा इशारा इस्रायलने याआधीच उघडपणे आणि गुप्तपणे दिला होता.

दुसरीकडे, खामेनींच्या हत्येनंतर इराणने संपूर्ण पश्चिम आशियामध्ये प्रत्युत्तरादाखल हल्ले सुरूच ठेवले आहेत. पश्चिम जेरुसलेममध्ये बॅलेस्टिक मिसाइल हल्ल्यात ९ जणांचा मृत्यू झाला. दरम्यान, इस्रायलमधील आणीबाणी या महिन्याच्या १२ तारखेपर्यंत वाढवण्यात आली आहे. इराणने आखाती प्रदेशातही हल्ले सुरू ठेवले आहेत. बहरीनमधील सलमान बंदरावर हल्ला करण्यात आला, ज्यामुळे परिसरात मोठी आग लागली. UAE ने इराणमधील आपला दूतावास बंद करून आपली भूमिका अधिक कठोर केली आहे. याचदरम्यान, इराणविरोधातील लष्करी कारवाई चार आठवड्यांपर्यंत चालू शकते, अशी प्रतिक्रिया ट्रम्प यांनी दिली आहे. इराण मोठा देश असल्याने वेळ लागेल, असं ट्रम्प म्हणाले. अमेरिका, ब्रिटन, फ्रान्स आणि जर्मनी यांनी एकत्र येऊन कारवाई करण्याची तयारी दर्शवली आहे.