गर्भपाताच्या गोळीचे जनक डॉ. बाउलिउ यांचे निधन, 98 व्या वर्षी घेतला अखेरचा श्वास

जगावर प्रभाव पाडणाऱ्या फ्रेंच व्यक्ती म्हणून फ्रेंच राष्ट्राध्यक्ष इमॅन्युएल मॅक्रॉन यांनी डॉ. बाउलिउ यांचे कौतुक केले. धाडसाचा एक दिवा आणि महिलांना त्यांचे स्वातंत्र्य मिळवून देणारे प्रगतीशील विचारसरणीचे व्यक्ती असे त्यांनी वर्णन केले.

पॅरिस : गर्भपात गोळीचे जनक म्हणून ओळखले जाणारे फ्रेंच बायोकेमिस्ट आणि डॉक्टर एटिएन एमिल बाउलिउ यांचे निधन झाले आहे. ९८ व्या वर्षी या जगप्रसिद्ध फ्रेंच शास्त्रज्ञाने जगाचा निरोप घेतला. त्यांच्या पत्नीने एका निवेदनाद्वारे पॅरिसमधील त्यांच्या घरी त्यांचे निधन झाल्याचे सांगितले. जगभरातील लाखो महिलांसाठी गर्भपाताचा सुरक्षित आणि स्वस्त मार्ग शोधून काढल्यामुळे एमिल बाउलिउ प्रसिद्ध झाले. एटिएन एमिल बाउलिउ यांनी RU-४८६ ही तोंडावाटे घेण्याची गोळी विकसित केली.

१९२६ मध्ये १२ डिसेंबर रोजी स्ट्रासबर्ग येथे एटिएन ब्लम या नावाने डॉ. बाउलिउ यांचा जन्म झाला. १५ व्या वर्षी नाझी आक्रमणाला विरोध करणाऱ्या फ्रेंच चळवळीत सामील होण्यासाठी त्यांनी आपले नाव बदलले. पदवीधर झाल्यानंतर ते अमेरिकेत गेले. तेथे त्यांनी डॉ. ग्रेगरी पिंकस यांच्यासोबत काम केले. डॉ. पिंकस यांनी त्यांना लैंगिक संप्रेरकांवर लक्ष केंद्रित करण्याचा सल्ला दिला. फ्रान्समध्ये परतल्यानंतर डॉ. बाउलिउ यांनी प्रोजेस्टेरॉन या संप्रेरकाचा प्रभाव रोखण्यासाठी एक पद्धत विकसित केली, जो गर्भाशयात अंडे स्थिरावण्यासाठी आवश्यक असतो. 

दहा वर्षांच्या आत त्यांनी गर्भपात गोळी विकसित केली, परंतु गर्भपाताला विरोध करणाऱ्यांकडून त्यांना तीव्र टीका आणि धमक्यांचा सामना करावा लागला. अखेर १९८८ मध्ये या गोळीच्या विक्रीला मान्यता मिळाली. परंतु युरोप आणि अमेरिकेत त्यावेळी यामुळे मोठा निषेध झाला. गर्भपाताच्या बाजूने आणि विरोधात असलेल्यांमध्ये वादाचा विषय म्हणून आजही ते सुरूच आहे. जगभरातील १०० हून अधिक देशांमध्ये या औषधाचा वापर मान्य केला असला तरी, अमेरिका आणि इतर अनेक देशांमध्ये हे औषध अजूनही कठोरपणे नियंत्रित आहे.

जगावर प्रभाव पाडणाऱ्या फ्रेंच व्यक्ती म्हणून फ्रेंच राष्ट्राध्यक्ष इमॅन्युएल मॅक्रॉन यांनी डॉ. बाउलिउ यांचे कौतुक केले. धाडसाचा एक दिवा आणि महिलांना त्यांचे स्वातंत्र्य मिळवून देणारे प्रगतीशील विचारसरणीचे व्यक्ती असे त्यांनी वर्णन केले. जगावर इतका प्रभाव पाडणाऱ्या फ्रेंच लोकांची संख्या खूपच कमी आहे, असे ते म्हणाले. फ्रान्सच्या लिंग समानता मंत्री अरोर बर्गे यांनी म्हटले की, डॉ. बाउलिउ यांना आयुष्यभर मानवी प्रतिष्ठा या तत्त्वाने प्रेरित केले.