Flydubai Co-Pilot : फ्लाईदुबईचा तो को-पायलट कोण? सीरिया कनेक्शन आणि ओमानमधील बंदीची माहिती समोर
सार
फ्लाईदुबईच्या विमानात भारतीय कॅप्टन स्मित मच्छार यांच्यावर हल्ला करणाऱ्या ओमानच्या को-पायलटचे नाव हम्माम अलहमामी आहे. या हल्ल्यामुळे विमान वेगाने खाली आले होते. पण प्रवासी आणि क्रू मेंबर्सच्या मदतीने सौदी अरेबियात विमानाचे सुरक्षित लँडिंग झाले.
मुंबई : तेल अवीवला जाणाऱ्या फ्लाईदुबईच्या विमानात भारतीय कॅप्टन स्मित मच्छार यांच्यावर हल्ला झाला होता. या हल्ल्यातील आरोपी ओमानचा को-पायलट हम्माम अलहमामी असल्याची माहिती सौदीच्या 'अल अरेबिया' वृत्तवाहिनीने दिली आहे. त्याच्याबद्दल आता अनेक धक्कादायक गोष्टी समोर येत आहेत. याआधी ओमानमध्ये त्याच्यावर विमान उडवण्यास बंदी होती आणि तो काही काळ सीरियातही राहिला होता, असे नवीन अहवालात म्हटले आहे.
कोण आहे हम्माम अलहमामी?
अलहमामीचे विचार अतिरेकी असल्याचा संशय आल्याने ओमानमध्ये त्याच्यावर विमान उडवण्यास बंदी घालण्यात आली होती. 'अल अरेबिया'च्या सूत्रांनुसार, त्याने ओमानबाहेर, विशेषतः सीरियामध्ये बराच काळ घालवला होता. तिथेच तो अतिरेकी विचारांच्या प्रभावाखाली आला आणि त्यानंतर तो यूएईला गेला. 'वॉल स्ट्रीट जर्नल'नेही ओमानने त्याच्यावर यापूर्वीच बंदी घातल्याचे वृत्त दिले आहे.
'एबीसी न्यूज'ने गुप्तचर आणि कायदा अंमलबजावणी अधिकाऱ्यांच्या हवाल्याने आणखी एक मोठा दावा केला आहे. ओमान एअरमध्ये को-पायलट ट्रेनी म्हणून काम करत असताना त्याच्याकडे काही आक्षेपार्ह आणि अतिरेकी साहित्य सापडले होते. त्यामुळे त्याला निलंबित करण्यात आले होते. अधिकाऱ्यांच्या माहितीनुसार, त्याला एक वर्षासाठी विमान उडवण्यापासून रोखले होते, पण तो प्रशासकीय विभागात काम करत राहिला.
त्याच्या या संशयास्पद पार्श्वभूमीची माहिती इतर देश किंवा विमान कंपन्यांना दिली होती की नाही, हे अद्याप स्पष्ट झालेले नाही. एवढे सगळे होऊनही त्याला फ्लाईदुबईमध्ये नोकरी कशी मिळाली, याचा तपास आता अधिकारी करत आहेत.
फ्लाईदुबईच्या विमानात नेमकं काय घडलं?
दुबईहून तेल अवीवला जाणाऱ्या फ्लाईदुबईच्या FZ1073 या विमानात हा भयानक प्रकार घडला. कॉकपिटमध्ये को-पायलटने कॅप्टन स्मित मच्छीयार यांच्यावर अचानक हल्ला केला. यामुळे विमानाचे नियंत्रण सुटले आणि ते वेगाने खाली येऊ लागले. सुदैवाने प्रवासी आणि क्रू मेंबर्सनी वेळीच हस्तक्षेप केला. विमानात उपस्थित असलेल्या इतर पायलट्सनी विमानावर पुन्हा नियंत्रण मिळवले. त्यानंतर सौदी अरेबियातील ताबुक येथे विमानाचे सुरक्षित लँडिंग करण्यात आले.
या झटापटीत कॅप्टन स्मित मच्छार गंभीर जखमी झाले होते. पण तरीही त्यांनी हिंमत न हारता कॉकपिटचा दरवाजा उघडला. त्यामुळे प्रवासी आणि क्रू मेंबर्स आत येऊ शकले आणि त्यांनी हल्लेखोराला पकडले. कॅप्टन स्मित मच्छार यांनी नंतर पंतप्रधान नरेंद्र मोदी यांना सांगितले की, "मी माझ्या जीवासाठी लढत होतो. एका क्षणी मला जाणवले की जर मी आता उठलो नाही, तर सर्व प्रवाशांना आपला जीव गमवावा लागेल."
हल्ल्यामागचे कारण काय? तपास सुरू
या संपूर्ण प्रकरणाचा तपास यूएई करत असून इस्रायली अधिकारीही यात सहभागी आहेत. को-पायलटची पार्श्वभूमी, कॉकपिटमधील हल्ल्याची परिस्थिती आणि यात आणखी कोणाचा सहभाग आहे का, याची कसून चौकशी सुरू आहे. हल्ल्यामागचे नेमके कारण अद्याप समजू शकलेले नाही. तसेच, त्याच्या अतिरेकी विचारांच्या दाव्यांची अद्याप अधिकृत पुष्टी झालेली नाही.