कंपनीत झोपल्याने नोकरी गेली, कोर्टाने दिला ४ कोटींचा दंड

ऑफिसमध्ये काम करत असताना एका कर्मचाऱ्याला झोप लागली. यामुळे कंपनीने त्याला कामावरून काढून टाकले. मात्र, कर्मचाऱ्याने कंपनीविरुद्ध कायदेशीर लढा दिला आणि त्याला तब्बल ४ कोटी रुपयांचे नुकसान भरपाई मिळाली.

झैंग्सू. ऑफिसमध्ये एका कर्मचाऱ्याला झोप लागली. झोप आवरत नसल्याने तो आपल्या डेस्कवरच झोपला. मात्र, कामाच्या वेळेत झोपल्याबद्दल केमिकल कंपनीने कठोर कारवाई केली आणि त्या कर्मचाऱ्याला कामावरून काढून टाकले. मात्र, कंपनीविरुद्ध कायदेशीर लढा देणाऱ्या या कर्मचाऱ्याला आता नुकसान भरपाई मिळाली आहे. कोर्टाने कंपनीविरुद्ध कठोर कारवाई करत तब्बल ४ कोटी रुपये नुकसान भरपाई म्हणून कर्मचाऱ्याला देण्याचे आदेश दिले आहेत. ही घटना चीनमधील झैंग्सू प्रांतात घडली आहे.

झांग नावाचा हा कर्मचारी गेल्या २० वर्षांपासून या केमिकल कंपनीत काम करत होता. २००४ मध्ये तो या कंपनीत रुजू झाला होता. कामाचा ताण, अतिरिक्त काम अशा अनेक आव्हानांना झांग रोज सामोरा जात असे. काही कर्मचारी कंपनी सोडून गेल्याने त्यांची जबाबदारीही झांगवर आली होती. उशिरापर्यंत काम करून घरी गेलेला झांग दुसऱ्या दिवशी सकाळी नेहमीप्रमाणे कामावर हजर झाला.

मात्र, दुपारच्या सुमारास झांगला झोप लागू लागली. तोंड धुवून आल्यानंतर त्याने पुन्हा काम सुरू केले. पण झोप आवरत नव्हती. त्यामुळे तो कामाच्या डेस्कवरच झोपला. थकवा आणि नीट झोप न मिळाल्याने झांग जवळजवळ एक तास झोपला. नंतर तो उठला आणि काम सुरू केले. दुसऱ्या दिवशी सकाळी झांग कामावर आला तेव्हा कंपनी व्यवस्थापन संतापले होते.

सीसीटीव्ही फुटेज तपासल्यानंतर झांग झोपलेला असल्याचे दिसून आले. एक तासापेक्षा जास्त वेळ झोपल्याने कंपनी संतापली आणि झांगला तात्काळ ईमेलद्वारे कारणे दाखवून कामावरून काढून टाकण्यात आले. २००४ मध्ये कामावर रुजू होताना कंपनीच्या अटी आणि शर्तींवर स्वाक्षरी केली होती. मात्र, ऑफिसच्या वेळेत, कामाच्या दरम्यान तासन्तास झोपल्याने कंपनीच्या शून्य सहनशीलतेच्या नियमाचे उल्लंघन केले आहे. कंपनीचा वेळ वाया घालवला आहे. यामुळे उत्पादकता कमी झाली आहे. असे वर्तन कंपनी सहन करणार नाही, म्हणून तुम्हाला कामावरून काढण्यात येत आहे, असे ईमेलमध्ये म्हटले होते.

झोपल्यामुळे अचानक कामावरून काढून टाकल्याबद्दल झांगने कंपनीविरुद्ध कायदेशीर लढा दिला. त्याने पीपल्स कोर्टात धाव घेतली. कोर्टाने प्रकरणाची सुनावणी हाती घेतली आणि कंपनीकडून अहवाल आणि सीसीटीव्ही फुटेज मागवले. सुनावणीदरम्यान कोर्टाने कंपनीला फटकारले. २० वर्षे कंपनीसाठी काम केले आहे. कामाच्या वेळेत झोपणे हे ऑफिसच्या नियमानुसार चुकीचे आहे हे खरे आहे, पण त्यासाठी अशी शिक्षा देणे योग्य नाही. दोन दशके कंपनीत काम केलेल्या व्यक्तीला किती बढती दिली आहे? पगार किती वेळा वाढवला आहे? असे कोर्टाने कंपनीला विचारले. झोपल्यामुळे कामावरून काढण्याचे कारण नाही. त्यामुळे कर्मचाऱ्याला ४ कोटी रुपये नुकसान भरपाई द्या, असे कोर्टाने आदेश दिले.