Earthquake : दक्षिण अमेरिकेजवळ ड्रेक पॅसेजमध्ये 7.5 तीव्रतेचा भूकंप, सुनामीचा धोका नाही

अमेरिकेजवळ असलेल्या ड्रेक पॅसेज परिसरात भारतीय प्रमाण वेळेनुसार शुक्रवारी सकाळच्या सुमारास भूकंपाचे धक्के जाणवले असून यामुळे सुनामीचा धोका नसल्याचे सांगितले जात आहे.

वॉशिंग्टन- गुरुवारी दक्षिण अमेरिका आणि अंटार्क्टिका यांच्या मधल्या ड्रेक पॅसेज भागात ७.५ रिश्टर स्केल तीव्रतेचा भूकंप झाला. हा भूकंप जोरदार होता, पण पॅसिफिक सुनामी वॉर्निंग सेंटरने सांगितले की यामुळे मोठा सुनामीचा धोका नाही.

सुरुवातीला या भूकंपाची तीव्रता ८.० असल्याचे सांगण्यात आले होते, पण यूएस जिऑलॉजिकल सर्व्हे (USGS) ने नंतर ती कमी करून ७.५ केली. हा भूकंप फक्त ११ किलोमीटर खोलीवर झाला. भूकंपाचे केंद्र अर्जेंटिनामधील सर्वात दक्षिणेकडील शहर उशुआया (लोकसंख्या सुमारे ५७,०००) पासून साधारण ७०० किलोमीटर अंतरावर होते. हा भूकंप २१ ऑगस्ट रोजी संध्याकाळी ४:१६ वाजता (HST), म्हणजेच भारतात २२ ऑगस्ट सकाळी ७:४६ वाजता झाला.

सुरुवातीला पॅसिफिक सुनामी वॉर्निंग सेंटरने चिलीच्या काही किनाऱ्यांसाठी इशारा दिला होता, पण नंतर स्पष्ट केले की हवाई किंवा दूरच्या भागांना धोका नाही. चिलीच्या नेव्हीच्या महासागरशास्त्र विभागाने अंटार्क्टिकामधील त्यांच्या भागासाठी देखील सुनामीची खबरदारी घेतली, कारण भूकंपाचे केंद्र चिलीच्या बेस फ्रेई संशोधन केंद्रापासून सुमारे २५८ किलोमीटर अंतरावर होते.

या भागात लोकसंख्या कमी असल्यामुळे कोणतेही नुकसान किंवा जीवितहानी झाल्याचे अहवाल नाहीत.