डोनाल्ड ट्रम्प, व्लादिमीर पुतीन यांची अडीच तास युक्रेनवर चर्चा, ट्रम्प म्हणाले- तोडगा नाहीच

अमेरिकेचे अध्यक्ष डोनाल्ड ट्रम्प आणि रशियाचे अध्यक्ष व्लादिमीर पुतिन यांची अलास्का बैठक अशा वेळी होत आहे, जेव्हा युक्रेनचे अध्यक्ष वोलोडिमिर झेलेन्स्की यांनी आरोप केला आहे की रशियाच्या अलीकडच्या हालचाली मॉस्कोला अधिक ताकदवान बनवण्यासाठी आहेत.

अमेरिकेचे अध्यक्ष डोनाल्ड ट्रम्प आणि रशियाचे अध्यक्ष व्लादिमीर पुतिन यांची अलास्कामध्ये सुमारे दोन-अडीच तास बैठक झाली. ही बैठक हस्तांदोलन, हसू आणि राष्ट्राध्यक्षांच्या गाडीतून एकत्र प्रवासाने सुरू झाली, जे एका अमेरिकन प्रतिस्पर्ध्याला दिलेले अनोखे स्वागत मानले गेले.

दोन्ही नेत्यांनी नंतर आपल्या वरिष्ठ सल्लागारांसोबत युक्रेन युद्ध संपवण्याच्या प्रयत्नांवर चर्चा केली. बैठकीनंतर त्यांनी संयुक्त पत्रकार परिषद घेतली, मात्र कोणतेही प्रश्न स्वीकारले नाहीत किंवा युक्रेनच्या भवितव्याविषयी तपशील सांगितला नाही.

युक्रेन करारावर मतभेद

बैठकीनंतर ट्रम्प म्हणाले की रशियाच्या युद्धाला पूर्णविराम देण्यासाठी कोणताही करार झाला नाही. पुतिन यांनी मात्र “समजूत” झाल्याचे सांगितले आणि युरोपला “या प्रगतीत अडथळा आणू नका” असा इशारा दिला. ट्रम्प यांनी मात्र स्पष्ट केले – “करार होईपर्यंत काहीही ठरलेले नाही.” त्यांनी लवकरच युक्रेनचे अध्यक्ष झेलेन्स्की आणि युरोपीय नेत्यांशी याबद्दल बोलणार असल्याचे सांगितले.

बैठकीच्या शेवटी पुतिन यांनी ट्रम्प यांना पुढील चर्चेसाठी मॉस्कोला आमंत्रण दिले. त्यावर ट्रम्प म्हणाले, “हे रोचक आहे, थोडा विरोध होईल, पण कदाचित ते होऊ शकते.”

रशियन तेलावर कराचा प्रश्न

बैठकीनंतर ट्रम्प म्हणाले की आत्ताच रशियन तेल खरेदी करणाऱ्या देशांवर कर लावण्याची गरज नाही, पण दोन-तीन आठवड्यांत विचार करावा लागू शकतो. “बैठक चांगली झाली आहे, त्यामुळे लगेच निर्णय घेण्याची गरज नाही,” असे त्यांनी फॉक्स न्यूजला सांगितले.

मेलानिया ट्रम्पचे पत्र

या बैठकीदरम्यान ट्रम्प यांनी पत्नी मेलानिया ट्रम्प यांचे वैयक्तिक पत्र पुतिन यांना दिले. या पत्रात युक्रेन आणि रशियामधील युद्धामुळे झालेल्या मुलांच्या अपहरणाचा उल्लेख होता. मेलानिया या बैठकीला उपस्थित नव्हत्या, पण पत्र खास करून पुतिन यांच्यापर्यंत पोहोचवण्यात आले.

झेलेन्स्कीवर जबाबदारी

बैठकीनंतर ट्रम्प म्हणाले की आता पुढील निर्णयाची जबाबदारी युक्रेनचे अध्यक्ष झेलेन्स्की यांच्यावर आहे. “आता हे काम झेलेन्स्की यांनी करायचे आहे. युरोपियन देशांनीही थोडी भूमिका घ्यायला हवी, पण मुख्य जबाबदारी झेलेन्स्की यांची आहे,” असे त्यांनी सांगितले.