Dubai Gold Road: जगात पहिल्यांदाच बनतोय सोन्याचा रस्ता, तुम्हीही चालू शकता यावर; पाहा कुठे?

जगात सोन्याच्या अनेक आश्चर्यकारक गोष्टी आहेत. लोकांनी सोन्याचे चमचे आणि सोन्याचे बाथरुमही बनवले आहेत. पण तुम्ही कधी सोन्याच्या रस्त्याबद्दल ऐकलंय का? दुबई आता असाच एक भन्नाट रस्ता बनवणार आहे.

दुबईत बनतोय सोन्याचा रस्ता

सोनं कोणाला आवडत नाही? सोन्याचे भाव कितीही वाढले तरी लोक सोनं खरेदी करतातच. आपण सोन्याच्या अनेक वस्तू पाहिल्या आहेत. पण तुम्हाला सोन्याच्या रस्त्यावर चालायला मिळालं तर कसं वाटेल? दुबई आता पर्यटकांसाठी असाच एक नवा अनुभव घेऊन येत आहे. दुबई जगातला पहिला आणि सर्वात लांब २४ कॅरेट सोन्याचा रस्ता बनवणार आहे.

कुठे बनणार हा रस्ता?

दुबईचा 'गोल्ड डिस्ट्रिक्ट' सोन्याच्या व्यापारासाठी जगभर प्रसिद्ध आहे. याच भागात हा सोन्याचा रस्ता बनणार आहे. हा रस्ता २०२६ च्या अखेरीस पूर्ण होईल. या रस्त्याची लांबी आणि खर्च किती असेल, हे दुबईने अद्याप सांगितलेले नाही. या प्रकल्पामुळे दुबईतील सोन्याच्या व्यापाराला मोठी चालना मिळत आहे. या वर्षाच्या सुरुवातीपासूनच येथील सोन्याच्या घाऊक व्यापाऱ्यांची संख्या २० टक्क्यांनी, तर किरकोळ दुकानांची संख्या १५ टक्क्यांनी वाढली आहे. पुढच्या वर्षी यात आणखी १० ते २० टक्के वाढ होईल, असा अंदाज आहे.

१६ किलोचे सोन्याचे झुमके

दुबईत सोन्याचा आणखी एक विक्रम आहे. जोयालुक्कास (Joyalukkas) या ब्रँडने २२ कॅरेट सोन्याचे तब्बल १६.५१४ किलो वजनाचे महाकाय झुमके बनवले आहेत. मोराच्या डिझाईनवरून प्रेरणा घेतलेल्या या दागिन्याला 'मयूर सहस्र' असं नाव दिलंय. या झुमक्यांनी दोन गिनीज वर्ल्ड रेकॉर्ड्स बनवले आहेत. हे झुमके विक्रीसाठी नसून दुबईत फक्त प्रदर्शनासाठी ठेवले जाणार आहेत. सोन्याच्या या नव्या रस्त्यामुळे दुबई आता जगभरातील पर्यटकांना आणखी आकर्षित करणार आहे.