Cyclone Wayanu : ताशी 130 किमी वेगाने वारा, मुसळधार पाऊस, न्यूझीलंडमध्ये 'वायानु' चक्रीवादळाचे तांडव

Cyclone Wayanu Slams New Zealand : न्यूझीलंडमध्ये 'वायानु' नावाच्या चक्रीवादळाने जोरदार हजेरी लावली आहे. मुसळधार पाऊस आणि सोसाट्याच्या वाऱ्यामुळे मोठं नुकसान झालंय. खबरदारीचा उपाय म्हणून नॉर्थ आयलंडमध्ये रेड अलर्ट जारी करण्यात आला असून हजारो लोकांना सुरक्षित ठिकाणी हलवण्यात आलं आहे.

Cyclone Wayanu Slams New Zealand : न्यूझीलंड सध्या 'वायानु' चक्रीवादळाचा सामना करत आहे. रविवार सकाळपासून सुरू झालेल्या मुसळधार पावसामुळे आणि सोसाट्याच्या वाऱ्यामुळे देशात मोठं नुकसान झाल्याचं समोर येत आहे. खबरदारीचा उपाय म्हणून किनारी आणि सखल भागांतील हजारो लोकांना सुरक्षित ठिकाणी हलवण्यात आलं आहे.

पुढील २४ तास नॉर्थ आयलंडमध्ये मुसळधार पाऊस आणि जोरदार वारे कायम राहतील, असा अंदाज हवामान खात्याने वर्तवला आहे. सोमवारपर्यंत चक्रीवादळाची तीव्रता कमी होऊन ते चॅथम बेटांच्या पश्चिमेकडे सरकेल, अशी अपेक्षा आहे.

या वादळात वारे ताशी १३० किलोमीटर वेगाने वाहत आहेत. समुद्रात १३ मीटर उंच लाटा उसळण्याची शक्यता हवामान विभाग 'मेटसर्व्हिस'ने वर्तवली आहे. त्यामुळे नॉर्थ आयलंडच्या बहुतांश भागांमध्ये रेड अलर्ट जारी करण्यात आला आहे.

जोरदार वाऱ्यामुळे अनेक ठिकाणी झाडं उन्मळून पडली आहेत, त्यामुळे हजारो घरांचा वीजपुरवठा खंडित झाला आहे. व्हकाटाने (Whakatāne) सारख्या किनारी शहरांमधून शेकडो कुटुंबांना सुरक्षित ठिकाणी हलवण्यात आलं आहे. प्रशासनाने लोकांना किमान दोन दिवस धोकादायक भागांपासून दूर राहण्याच्या सूचना दिल्या आहेत. मुसळधार पावसामुळे अनेक ठिकाणी दरडी कोसळल्या आहेत आणि पूरस्थिती निर्माण झाली आहे, ज्यामुळे रस्ते वाहतूक ठप्प झाली आहे.

याआधी २०२३ मध्ये आलेल्या 'गॅब्रिएल' चक्रीवादळाने न्यूझीलंडमध्ये मोठं नुकसान केलं होतं. त्यात ११ लोकांचा मृत्यू झाला होता आणि मोठं आर्थिक नुकसानही झालं होतं. तशीच परिस्थिती पुन्हा उद्भवू नये, यासाठी पंतप्रधान ख्रिστοफर लक्सन यांनी लोकांना अत्यंत सावधगिरी बाळगण्याचं आवाहन केलं आहे.