Water Diet : महिलेने १५ दिवस फक्त पाणी पिऊन वजन घटवलं, पण मेंदूचा गंभीर आजार जडला; प्रकृती गंभीर

एका ३१ वर्षीय महिलेने वजन कमी करण्यासाठी १५ दिवस फक्त पाणी पिऊन डाएट केलं. तिने 'बिगु' नावाच्या एका पारंपरिक उपवासाच्या पद्धतीचा अवलंब केला होता. यात अन्न पूर्णपणे वर्ज्य केलं जातं. पण या डाएटिंगमुळे तिला मेंदूचा एक गंभीर आजार झाला आहे.

बिजिंग : चीनमध्ये एका ३१ वर्षीय महिलेला फक्त पाणी पिऊन डाएट करणं चांगलंच महागात पडलं आहे. १५ दिवस फक्त पाण्यावर राहिल्यामुळे तिला मेंदूचा एक गंभीर आजार झाला. 'साऊथ चायना मॉर्निंग पोस्ट'ने दिलेल्या वृत्तानुसार, ही महिला हेनान प्रांतातील आहे. या डाएटमुळे काही आठवड्यांत तिचं वजन तब्बल २० किलोने कमी झालं, पण त्यानंतर तिला चालायला त्रास होऊ लागला आणि तिची स्मरणशक्तीही कमी झाली. डॉक्टरांच्या मते, या आजारातून ती पूर्णपणे बरी होण्याची शक्यता खूप कमी आहे.

या महिलेने 'बिगु' नावाच्या एका पारंपरिक ताओवादी उपवासाच्या पद्धतीचा अवलंब केला होता. या पद्धतीत अन्न पूर्णपणे वर्ज्य केलं जातं. यामागे अशी श्रद्धा आहे की, शरीर अन्नातून नाही, तर निसर्गातील 'ची' नावाच्या ऊर्जेवर चालतं. या कठोर डाएटमुळे तिचं वजन खूप कमी वेळात घटलं.

झेग्झोऊ युनिव्हर्सिटीच्या (Zhengzhou University) फर्स्ट एफिलिएटेड हॉस्पिटलमधील डॉक्टरांनी या महिलेला तपासलं. तेव्हा तिला 'वेर्निक एन्सेफॅलोपॅथी' (Wernicke encephalopathy) नावाचा मेंदूचा गंभीर आजार झाल्याचं निदान झालं. हा आजार शरीरात पोषक तत्वांच्या तीव्र कमतरतेमुळे होतो. यामुळे गोंधळल्यासारखं होणं, शरीराचा तोल जाणं आणि स्मरणशक्ती कमी होणं अशी लक्षणं दिसतात. न्यूरोलॉजिस्ट चेन गुइफांग यांनी सांगितलं की, या महिलेची चालण्याची पद्धत बदलली आहे आणि ती पुन्हा पूर्वीसारखी होण्याची शक्यता कमी आहे.

तज्ज्ञांच्या मते, वजन कमी करण्यासाठी आणि 'डिटॉक्स'साठी अनेकजण अशा पद्धतींचा वापर करतात, पण यामुळे गंभीर आरोग्य समस्या निर्माण होऊ शकतात, इतकंच नाही तर मृत्यूही ओढवू शकतो. चिनी सोशल मीडियावर अशा डाएट ट्रेंड्सना मोठी पसंती मिळत असली, तरी असे कठोर डाएट आणि खाण्यावर नियंत्रण ठेवणं जीवासाठी धोकादायक ठरू शकतं, असा इशारा आरोग्य तज्ज्ञांनी दिला आहे.