Chinese Man Extracts Gold : चीनमधील एका व्यक्तीने जुन्या सिम कार्ड्समधून 191 ग्रॅम सोनं काढून सर्वांना आश्चर्यचकित केलं आहे. यासंबंधीचे व्हिडिओ सध्या सोशल मीडियावर व्हायरल झाले आहेत. चला तर मग, याबद्दल सविस्तर जाणून घेऊया.
तुमच्या घरी जुने सिम कार्ड्स आहेत का? मग तुम्ही करोडपती होऊ शकता
चीनच्या ग्वांगडोंग प्रांतातील क्यो नावाचा एक व्यक्ती सोशल मीडियावर रातोरात स्टार बनला आहे. त्याने जुने सिम कार्ड्स आणि इलेक्ट्रॉनिक कचरा म्हणजेच ई-वेस्टपासून तब्बल 191 ग्रॅम शुद्ध सोनं काढून नेटकऱ्यांना चकित केलं आहे. याची किंमत भारतीय चलनात सुमारे 28 लाख रुपये आहे. हा व्हिडिओ पाहिल्यानंतर नेटकरी त्याला 'किमयागार' (Alchemist) म्हणत आहेत.
26
2 टन कचऱ्यामागील खरं सत्य
हा व्हिडिओ व्हायरल झाल्यानंतर, अनेकजण आपल्या घरातील जुन्या सिम कार्ड्समधून सोनं बनवू शकतात असं समजत आहेत. पण, क्योने इथे एक महत्त्वाची गोष्ट सांगितली आहे. त्याने काढलेलं 191 ग्रॅम सोनं फक्त काही सिम कार्ड्समधून आलेलं नाही. यासाठी त्याने सुमारे 2 टन वजनाचा टेलिकॉम चिपचा कचरा आणि जुने सर्किट बोर्ड वापरल्याचं उघड केलं. साधारणपणे एका सिम कार्डमध्ये 0.001 ग्रॅमपेक्षा कमी सोनं असतं. म्हणजेच, क्योने काढलेल्या सोन्यासाठी किमान 4 लाख सिम कार्ड्सची गरज भासेल.
36
अशाप्रकारे सोनं काढणं सोपं नाही
क्योने आपल्या व्हिडिओमध्ये मोठ्या केमिकल ड्रम्सचा वापर करून सोनं काढण्याची प्रक्रिया दाखवली. यामध्ये गंजवणे, डिस्प्लेसमेंट आणि उच्च तापमानात गरम करणे यांसारख्या पायऱ्या आहेत. शेवटी, गाळून मिळालेल्या गोल्ड मडला वितळवून त्याने सोन्याचं बिस्कीट बनवलं.
मात्र, या प्रक्रियेत वापरले जाणारे 'अक्वा रेजिया' नावाचे रसायन अत्यंत धोकादायक आहे. हे नायट्रिक ॲसिड आणि हायड्रोक्लोरिक ॲसिडचे मिश्रण आहे. यातून निघणारे विषारी वायू जीवघेणे ठरू शकतात, असा इशारा क्योने दिला आहे.
या व्हिडिओच्या प्रभावामुळे चीनमधील सेकंड हँड वेबसाइट्सवर जुन्या सिम कार्ड्सची विक्री वाढली आहे. अनेक व्यापारी सिम कार्ड्सचे बंडल सोनं काढण्यासाठी योग्य असल्याचे सांगून विकत आहेत. एका व्यक्तीने तर सोनं काढण्याचे टूल किट्स आणि ट्रेनिंग व्हिडिओ 485 युआन (सुमारे 5,700 रुपये) मध्ये विकायला सुरुवात केली आहे. विशेष म्हणजे, हजारो लोकांनी हे आधीच खरेदी केले आहे.
56
कायदेशीर अडचणी आणि कठोर शिक्षेची तरतूद
चीनमध्ये जुन्या सिम कार्ड्सना धोकादायक कचरा मानले जाते. परवान्याशिवाय त्याचे रिसायकलिंग करणे गुन्हा आहे. यापूर्वी जुन्या बॅटरीमधून शिसे काढणाऱ्या सात जणांना तीन वर्षांचा तुरुंगवास आणि मोठा दंड ठोठावण्यात आला होता. क्योने सांगितले की तो एक व्यावसायिक रिफायनर आहे आणि त्याच्याकडे सरकारकडून सर्व परवानग्या आहेत. सामान्य लोकांनी घरी असे प्रयोग केल्यास पर्यावरण प्रदूषण कायद्यांतर्गत कठोर शिक्षा होऊ शकते, असा इशारा त्याने दिला आहे.
66
भारतात ई-कचरा नियम काय आहेत?
भारतातही, ई-कचरा व्यवस्थापन नियम 2022 नुसार, अनधिकृतपणे सोनं काढणे हा गुन्हा आहे. अक्वा रेजियासारख्या ॲसिडच्या वापरामुळे भूजल दूषित होते. असे करताना आढळल्यास 5 वर्षांपर्यंत तुरुंगवास किंवा 1 कोटी रुपयांपर्यंत दंड होऊ शकतो. जुन्या इलेक्ट्रॉनिक वस्तू केवळ अधिकृत रिसायकलिंग केंद्रांना विकणे सुरक्षित आहे.
