Bizarre Business: खाजवून घ्या आणि ४,२०० रुपये द्या! हा विचित्र धंदा महिन्याला कमावतोय १४ लाख रुपये

चीनच्या शेन्झेन शहरात एका उद्योजकाने एक अनोखा व्यवसाय सुरू केला आहे. इथे लोकांना पैसे घेऊन त्यांची खाज खाजवून दिली जाते. एका तासाच्या या सेशनसाठी ग्राहक सुमारे ४,२०० रुपये देतात. यातून त्यांना आराम मिळतो आणि चांगली झोप लागते, असा दावा केला जातो.

कोणीतरी तुमची पाठ खाजवून दिली, तर तुम्ही त्याला ४,२०० रुपये द्याल का? ऐकायला विचित्र वाटेल, पण चीनमधल्या एका उद्योजकाने खाज खाजवण्याच्या या साध्या गोष्टीला एका मोठ्या व्यवसायात बदललं आहे. यातून तो महिन्याला तब्बल १४ लाख रुपये कमावत असल्याचं म्हटलं जातं.

चीनच्या हुबेई प्रांतातील ३२ वर्षीय झांग शियाओकिओ या तरुणाने शेन्झेन शहरात 'सुमा' (Suma) नावाची एक अनोखी चेन सुरू केली आहे. या व्यवसायात ग्राहकांना खास खाजवून देण्याची सेवा दिली जाते. ग्राहक बेडवर आरामात झोपतात आणि प्रशिक्षित कर्मचारी खास डिझाइन केलेल्या टोकदार नखांच्या साधनांनी त्यांच्या शरीराच्या वेगवेगळ्या भागांवर हळूवारपणे खाजवतात.

एका तासाच्या या सेशनसाठी ग्राहक सुमारे ३०० युआन, म्हणजेच जवळपास ४,२०० रुपये मोजतात. ही सेवा लोकांना तणावमुक्त करण्यासाठी आणि चांगली झोप लागण्यासाठी मदत करते, असं सांगून याचं मार्केटिंग केलं जातं. ग्राहकांना कोणत्या भागात जास्त खाज येत आहे, हे ते कर्मचाऱ्यांना सांगू शकतात. काही वेळा संवेदनशील भागांवर खाजवल्यामुळे ग्राहक हसू लागतात, असंही सांगितलं जातं.

साउथ चायना मॉर्निंग पोस्टच्या वृत्तानुसार, शेन्झेनमध्ये या व्यवसायाची दोन दुकानं आहेत आणि या दोन्ही दुकानांमधून महिन्याला सुमारे १,००,००० युआन (जवळपास १४ लाख रुपये) इतकी कमाई होते. झांगच्या मते, त्याच्या दुकानांनी आता नफा कमावण्यास सुरुवात केली आहे.

शहरी भागातील तणावग्रस्त ग्राहकांमध्ये या सेवेला चांगली मागणी असल्याचं झांगचं म्हणणं आहे. तो म्हणाला, "मोठ्या शहरांमध्ये लोकांवर खूप जास्त ताण असतो. त्यामुळे या सेवेला मोठी मागणी आहे."

या सेवेचा लाभ घेणाऱ्यांमध्ये पुरुष आणि महिला दोघेही आहेत, पण त्यात ७० टक्के ग्राहक पुरुष आहेत. झांग पुढे म्हणाला, "काही ग्राहकांनी तर ही सेवा मसाजपेक्षाही जास्त आरामदायी असल्याचं म्हटलं आहे. त्यामुळे आमचे जुने ग्राहक पुन्हा पुन्हा येतात."

या व्यवसायाची कल्पना झांगला सोशल मीडियावर एक व्हिडिओ पाहिल्यानंतर सुचली. त्यात एक महिला आपल्या पतीची पाठ खाजवत होती. तो व्हिडिओ पाहिल्यानंतर अनेकांनी कमेंटमध्ये लिहिलं होतं की, 'असं खाजवून देण्यासाठी आम्ही पैसे देऊ'. हे वाचून झांगला वाटलं की, ही एक चांगली व्यवसायाची संधी होऊ शकते. लहानपणी वडील त्याची पाठ खाजवायचे आणि त्याला झोप लागायची, या आठवणीतूनही त्याला प्रेरणा मिळाली.

चीनमध्ये खाजवून देण्याचा असा कोणताही व्यवसाय आधीपासून नव्हता. त्यामुळे झांगने मानवी शरीराचा अभ्यास केला आणि स्वतःची खास पद्धत विकसित केली.

आता संपूर्ण चीनमध्ये 'सुमा'ची १०० दुकानं उघडण्याचं आणि 'खाजवून देणं' हा एक मान्यताप्राप्त व्यवसाय म्हणून स्थापित करण्याचं त्याचं स्वप्न आहे. पण काही लोक अजूनही यावर शंका व्यक्त करत आहेत. एका सोशल मीडिया युझरने विचारलं, "फक्त खाजवून घेण्यासाठी ३०० युआन देणारे खरंच इतके लोक आहेत का?"

मात्र, झांगसाठी त्याच्या ग्राहकांची वाढती संख्या हेच सांगते की, ही विचित्र कल्पना फक्त एक व्हायरल गोष्ट नाही, तर एक यशस्वी व्यवसाय आहे.