Balochistan: पाकिस्तानचे पुन्हा तुकडे? बलुचिस्तानची करन्सी, राष्ट्रगीत घोषित

पाकिस्तानमधील बलुचिस्तान प्रांत 'रिपब्लिक ऑफ बलुचिस्तान' नावाने स्वतंत्र राष्ट्र म्हणून घोषित झाल्याची बातमी सोशल मीडियावर वेगाने पसरत आहे. फुटीरतावादी गटांनी दावा केला आहे की, ८५ टक्के भूभाग त्यांच्या ताब्यात आहे. मात्र, या घोषणेला अद्याप कोणताही अधिकृत दुजोरा किंवा आंतरराष्ट्रीय मान्यता मिळालेली नाही.

इस्लामाबाद: पाकिस्तानमध्ये सध्या एकाच वेळी अनेक आघाड्यांवर अशांतता पसरली आहे. एकीकडे पाकव्याप्त काश्मीरमध्ये (POK) लोक रस्त्यावर उतरले आहेत, तर दुसरीकडे बलुचिस्तानमध्ये स्वातंत्र्याची घोषणा झाली आहे. पाकिस्तानचा सर्वात मोठा प्रांत असलेल्या बलुचिस्तानने स्वतःला स्वतंत्र राष्ट्र म्हणून घोषित केल्याचा दावा सोशल मीडियावर केला जात आहे. "रिपब्लिक ऑफ बलुचिस्तान" नावाने नवीन देश स्थापन केल्याचे एक निवेदन सध्या व्हायरल झाले आहे.

या दाव्यानुसार, नवीन सरकारने बलुचिस्तानच्या सुमारे ८५ टक्के भागावर नियंत्रण मिळवले आहे. तसेच, स्वतःचा राष्ट्रध्वज, राष्ट्रगीत, चलन आणि प्रशासन प्रणाली सुरू केल्याचेही म्हटले आहे. मात्र, या दाव्यांना अद्याप स्वतंत्रपणे दुजोरा मिळालेला नाही किंवा पाकिस्तान सरकारनेही यावर कोणतीही अधिकृत प्रतिक्रिया दिलेली नाही.

'आम्ही स्वतंत्र, आम्हाला मान्यता द्या'

व्हायरल झालेल्या निवेदनात, आंतरराष्ट्रीय समुदायाने बलुचिस्तानला एक स्वतंत्र राष्ट्र म्हणून मान्यता द्यावी आणि संयुक्त राष्ट्रांसह जागतिक संघटनांनी पाठिंबा द्यावा, अशी मागणी करण्यात आली आहे. मात्र, आतापर्यंत कोणत्याही देशाने बलुचिस्तानला स्वतंत्र राष्ट्र म्हणून मान्यता दिलेली नाही. त्यामुळे सोशल मीडियावर फिरणाऱ्या या माहितीला अधिकृत घोषणा मानता येणार नाही, असे 'मनीकंट्रोल'च्या वृत्तात म्हटले आहे.

BREAKINGN NEWS 🚨⚓️✈️
The Republic of Balochistan's Defense and Security Forces Have Secured 85% of Balochistan's Territory

13 July, 2026

Balochistan has declared its independence, adopted its national anthem, “"Ma Chukain Balochani," introduced its national flag, established… pic.twitter.com/sCUm7rSlye

— Mir Yar Baloch (@miryar_baloch) July 13, 2026

भू-राजकीय महत्त्व

नैसर्गिक साधनसंपत्तीच्या बाबतीत बलुचिस्तान हा अत्यंत श्रीमंत प्रदेश आहे. तांबे, सोने, कोळसा आणि नैसर्गिक वायू यांसारख्या खनिजांचे मोठे साठे येथे आहेत. विशेष म्हणजे, चीन-पाकिस्तान इकॉनॉमिक कॉरिडॉर (CPEC) या महत्त्वाकांक्षी प्रकल्पातील महत्त्वाचे ग्वादर बंदरही बलुचिस्तानमध्येच आहे. या आर्थिक आणि भू-राजकीय महत्त्वामुळे, या प्रदेशातील राजकीय घडामोडींचे दक्षिण आशियामध्ये मोठे परिणाम होऊ शकतात, असे तज्ज्ञांचे मत आहे.

Frightened to perform their duties in #Balochistan, #Pakistani Frontier Corps personnel placed dummy figures dressed in military uniforms at an outpost to create the illusion that troops were on guard. The bizarre tactic has drawn ridicule and raised serious questions about… pic.twitter.com/M9zHX5drr8

— IDU (@defencealerts) July 13, 2026

फुटीरतावादी चळवळ

बलुचिस्तानमध्ये अनेक दशकांपासून फुटीरतावादी चळवळी आणि सशस्त्र संघर्ष सुरू आहे. गेल्या काही दिवसांपासून पाकिस्तानी सुरक्षा दल आणि बलोच फुटीरतावादी संघटनांमध्ये चकमकी वाढल्या आहेत. या हल्ल्यांमध्ये अनेक सुरक्षा अधिकारी आणि सशस्त्र कार्यकर्ते मारले गेल्याचे पाकिस्तानने म्हटले आहे. याच पार्श्वभूमीवर स्वातंत्र्याच्या घोषणेचा दावा सोशल मीडियावर पुन्हा एकदा जोर धरत आहे.

मात्र, सध्या व्हायरल होत असलेल्या "रिपब्लिक ऑफ बलुचिस्तान"च्या घोषणेला आणि ८५ टक्के प्रदेश नियंत्रणात असल्याच्या दाव्याला कोणत्याही स्वतंत्र आंतरराष्ट्रीय माध्यमांनी किंवा अधिकृत एजन्सीने दुजोरा दिलेला नाही. पाकिस्तान सरकारनेही याबाबत कोणतेही अधिकृत निवेदन जारी केलेले नाही. त्यामुळे, या विषयावरील खरी माहिती आणि सोशल मीडियावरील दावे यात मोठी तफावत असल्याचे दिसून येते.