चीनमध्ये ७.१ रिश्टर स्केल तीव्रतेच्या भूकंपामुळे ५३ जणांचा मृत्यू, पाहा व्हिडिओ

नेपाळ-तिबेट सीमेवर ७.१ रिश्टर स्केलच्या भूकंपाने चीन, भारत, भूतान आणि बांगलादेशला हादरे बसले. चीनमध्ये ५३ लोकांचा मृत्यू झाल्याची नोंद केली आहे

नेपाळ-तिबेट सीमेवर ७.१ रिश्टर स्केलच्या भूकंपाने चीन, भारत, भूतान आणि बांगलादेशला हादरे बसले. जीवितहानी आणि मालमत्तेचे नुकसान झाल्याचे प्रथम अहवाल चीन मधून आले आहेत, जेथे  ५३ लोकांचा मृत्यू झाल्याची नोंद केली आहे. स्थानिकांनी ढिगारा, घरे कोसळताना आणि गोंधळाचे व्हिडिओही शेअर केले आहेत

रॉयटर्सच्या म्हणण्यानुसार, भूकंपामुळे तिबेट प्रदेशात किमान ५३ लोकांचा मृत्यू झाला आहे. चीनच्या शिन्हुआ न्यूज एजन्सीने सांगितले की, ६२ लोक जखमी झाले आहेत.

चीनी मीडियानुसार, भूकंपाच्या केंद्राजवळ अनेक इमारती कोसळल्या. चीनच्या सरकारी मीडिया सीसीटीव्हीने वृत्त दिले आहे की डिंगरी काउंटी आणि आसपासच्या भागात भूकंपाचे जोरदार धक्के जाणवले. भूकंपाच्या केंद्राजवळील अनेक इमारती कोसळल्या.

नॅशनल सेंटर फॉर सिस्मॉलॉजीनुसार, नेपाळ-तिबेट सीमेजवळील शिजांग येथे मंगळवारी सकाळी ६.३५ वाजता ७.१ रिश्टर स्केलचा पहिला भूकंप झाला. तिबेटमधील दुसऱ्या क्रमांकाचे मोठे शहर शिगात्से येथे चिनी अधिकाऱ्यांनी ६.८ तीव्रतेचा भूकंप नोंदवला. याच शिजांग परिसरात 4.7 आणि 4.9 रिश्टर स्केलचे दोन धक्केही जाणवले.

ज्या ठिकाणी भारत आणि युरेशिया प्लेट्सची टक्कर झाली त्याच ठिकाणी भूकंपाचा केंद्रबिंदू होता. त्यामुळे हिमालय पर्वतांची उंची वाढत आहे. गेल्या पाच वर्षांत, शिगात्से शहराच्या 200 किलोमीटर परिसरात 3 किंवा त्याहून अधिक तीव्रतेचे 29 भूकंप झाले आहेत. मंगळवारी सकाळी झालेल्या भूकंपापेक्षा या सर्वांची तीव्रता कमी होती