Asian Para Games 2026: एशियन पॅरा गेम्समध्ये भारताचा दबदबा, एकाच इव्हेंटमध्ये सुवर्ण आणि रौप्य

Asian Para Games 2026 India: भारतीय खेळाडूंनी जपानमध्ये (Japan) सुरू असलेल्या एशियन पॅरा गेम्समध्ये दमदार कामगिरी सुरूच ठेवली आहे. या स्पर्धेत अनेक इव्हेंट्समध्ये भारताने एकाच वेळी सुवर्ण आणि रौप्य पदके जिंकली आहेत. यामुळे भारताच्या पदकांची संख्या वेगाने वाढत असून, पदक तालिकेतही भारताने वरचे स्थान गाठले आहे.

Asian Para Games 2026 Medal Update: एशियन पॅरा गेम्समध्ये ॲथलेटिक्सच्या ट्रॅक अँड फील्ड इव्हेंटमध्ये भारताने पुन्हा एकदा मोठं यश मिळवलं आहे. गुरुवारी महिलांच्या ४०० मीटर T47 प्रकारात भारताची पॅरा ॲथलीट अंजनाबेन बुंबाडियाने (Anjanaben Bumbadiya) सुवर्णपदक जिंकलं. याच इव्हेंटमध्ये जयंती बेहरा (Jayanti Behera) हिने रौप्यपदक पटकावलं. यासोबतच महिलांच्या ४०० मीटर T12 प्रकारात दृष्टिहीन ॲथलीट तेजलबेन डामोरने (Tejalben Damor) रौप्यपदक जिंकून देशाच्या पदकांमध्ये भर घातली. अंजनाबेनने महिलांच्या ४०० मीटर T47 प्रकारात ५९.९७ सेकंद वेळ नोंदवत सुवर्णपदक जिंकलं. या शर्यतीत सहभागी झालेल्या चार स्पर्धकांपैकी फक्त तिनेच एका मिनिटापेक्षा कमी वेळेत शर्यत पूर्ण केली. जयंतीने १ मिनिट ०.६५ सेकंद वेळ नोंदवत रौप्यपदक मिळवलं. तर थायलंडच्या ससिरावान इंथाचोटने १ मिनिट २.५८ सेकंद वेळ नोंदवत कांस्यपदक जिंकलं.

अंजनाबेनचं देशासाठी मोठं यश

एशियन पॅरा गेम्समधील हे यश अंजनाबेनसाठी खूप खास आहे. तिने आपल्या दुसऱ्याच आंतरराष्ट्रीय स्पर्धेत सुवर्णपदक जिंकण्याची किमया साधली आहे. आपल्या या कामगिरीवर आनंद व्यक्त करताना ती म्हणाली, 'ही माझी दुसरी आंतरराष्ट्रीय स्पर्धा आहे. इथे सुवर्णपदक जिंकल्याचा मला खूप आनंद आहे. माझं सर्वोत्तम देणं हेच माझं ध्येय होतं आणि या इव्हेंटमध्ये ते साध्य केल्याचा मला अभिमान आहे.' अंजनाबेनच्या सुवर्ण आणि जयंतीच्या रौप्यपदकामुळे भारतीय ॲथलेटिक्स संघाच्या यशात आणखी भर पडली आहे. T47 प्रकारात असे खेळाडू सहभागी होतात, ज्यांच्या एका हाताच्या वरच्या भागात अपंगत्व आहे. कोपराच्या खाली किंवा मनगटाजवळ हात नसलेले खेळाडूही या गटात खेळतात. दुसरीकडे, तेजलबेनने महिलांच्या ४०० मीटर T12 प्रकारात ५७.६० सेकंद वेळ नोंदवत रौप्यपदक जिंकलं. या स्पर्धेतील तिचं हे दुसरं पदक आहे. याआधी तिने महिलांच्या २०० मीटर T12 प्रकारात कांस्यपदक जिंकलं होतं. पुन्हा एकदा पदक जिंकून तेजलबेनने दृष्टिहीन खेळाडूंमध्ये भारताचं नाव उंचावलं आहे.

एशियन पॅरा गेम्समध्ये भारताची पदके वाढतायत

गुरुवारी ट्रॅकवर मिळालेल्या या तीन पदकांमुळे एशियन पॅरा गेम्समध्ये भारताचं ॲथलेटिक्समधील यश आणखी झळाळून निघालं आहे. विशेषतः आंतरराष्ट्रीय स्तरावर कमी अनुभव असूनही अंजनाबेनने जिंकलेलं सुवर्णपदक नक्कीच कौतुकास्पद आहे. तिने एका मिनिटापेक्षा कमी वेळेत शर्यत पूर्ण करणं आणि जयंतीची झुंजार कामगिरी यामुळे भारताला एकाच इव्हेंटमध्ये सुवर्ण आणि रौप्यपदक मिळालं.