गोळीबार करणाऱ्या मुस्लिम हल्लेखोराला निशस्त्र हातांनी पकडले, अहमद ठरला ऑस्ट्रेलियाचा हिरो!

Ahmed Al Ahmed Becomes Hero : सिडनीच्या बोंडी बीचवर झालेल्या गोळीबारादरम्यान, अहमद अल अहमद नावाच्या व्यक्तीने हल्लेखोराला रिकामा हाताने पकडून त्याची बंदूक हिसकावून घेतली. 

Ahmed Al Ahmed Becomes Hero : सिडनीच्या बोंडी बीचवर झालेल्या गोळीबारादरम्यान, आपला जीव धोक्यात घालून मुस्लिम हल्लेखोराला पकडणाऱ्या आणि अनेकांचे प्राण वाचवणाऱ्या तरुणाच्या धैर्याचे जग कौतुक करत आहे. सामान्य नागरिकांवर गोळीबार होत असताना, एका निशस्त्र व्यक्तीने बंदूकधाऱ्यांपैकी एकाचा सामना केल्याचा व्हिडिओ सोशल मीडियावर व्हायरल झाला होता. हल्लेखोराचा सामना करणारी व्यक्ती ४३ वर्षीय फळविक्रेता अहमद अल अहमद आहे. हल्ल्यादरम्यान त्याला दोन गोळ्या लागल्या. पंधरा सेकंदांच्या व्हिडिओमध्ये, पार्क केलेल्या गाड्यांमागे लपलेला अहमद, मागून बंदूकधाऱ्याजवळ पोहोचतो, त्याच्या मानेला पकडून बंदूक हिसकावून घेतो, हल्लेखोराला खाली ढकलतो आणि नंतर त्याच्यावरच शस्त्र रोखतो. 

अहमदच्या शौर्यामुळे अनेकांचे प्राण वाचले. 'अहमद रुग्णालयात आहे, नक्की काय होत आहे हे आम्हाला माहीत नाही,' असे अहमदचा नातेवाईक मुस्तफाने माध्यमांना सांगितले. 'तो बरा होईल अशी आम्हाला आशा आहे. तो एक हिरो आहे,' असेही तो म्हणाला. सोशल मीडियावर अनेक जण अहमदच्या धैर्याचे कौतुक करत आहेत. पंतप्रधान अँथनी अल्बानीज यांनीही अहमदला हिरो म्हटले आहे.

बोंडी बीचवर हानुक्का उत्सवादरम्यान ज्यू नागरिकांवर झालेल्या गोळीबारात किमान ११ जण ठार झाल्याचे पोलिसांनी सांगितले. एका मुलासह २९ जणांना रुग्णालयात दाखल करण्यात आले आहे. दोन हल्लेखोर असल्याचा संशय पोलिसांनी व्यक्त केला आहे. त्यापैकी एक ठार झाला आहे, तर दुसरा रुग्णालयात उपचार घेत आहे. जवळच्या वाहनातून सापडलेली स्फोटके सुरक्षितपणे निकामी करण्यात आल्याचेही अधिकाऱ्यांनी सांगितले.

हानुक्काच्या पहिल्या दिवशी उत्सव साजरा करण्यासाठी शेकडो लोक जमले असताना हा हल्ला झाला आणि या हल्ल्याला दहशतवादी घटना म्हणून घोषित करण्यात आले आहे, असे न्यू साउथ वेल्स पोलिसांनी सांगितले. मृतांमध्ये एका इस्रायली नागरिकाचा समावेश असल्याचे इस्रायलच्या परराष्ट्र मंत्रालयाने म्हटले आहे. हल्ल्यानंतर राष्ट्रीय सुरक्षा समितीची तातडीची बैठक बोलावण्यात आल्याचे पंतप्रधान अँथनी अल्बानीज यांनी सांगितले.

हानुक्का उत्सवादरम्यान बोंडीमध्ये दहशतवादी हल्ला झाला. हानुक्काच्या पहिल्या दिवशी ज्यू ऑस्ट्रेलियन लोकांना लक्ष्य करून हा हल्ला करण्यात आल्याचा अंदाज आहे. 'या हल्ल्याने आपल्या देशाच्या हृदयावर जखम केली आहे,' असे ते म्हणाले. 'ज्यू ऑस्ट्रेलियन लोकांवरील हल्ला हा प्रत्येक ऑस्ट्रेलियन नागरिकावरील हल्ला आहे. आपल्या देशात या द्वेष, हिंसाचार आणि दहशतवादाला स्थान नाही. आम्ही ते संपवू, हे मी स्पष्टपणे सांगतो,' असेही ते म्हणाले.