
मलेशियाची राजधानी क्वालालंपूर येथे मंगळवारी, १७ नोव्हेंबरला AFC U-17 आशियाई चषक २०२७ च्या पात्रता फेरीचा सामना रंगला होता. या सामन्यात पॅलेस्टाईनविरुद्ध खेळताना भारताचा १९ वर्षांखालील (U-17) कर्णधार दलालमुआन गांगटे याला वर्णद्वेषी प्रकाराला सामोरे जावे लागले.
सध्या सोशल मीडियावर या घटनेचा व्हिडिओ मोठ्या प्रमाणावर व्हायरल होत आहे. 'ग्रुप ई' च्या या सामन्यात पॅलेस्टाईनचा १९ नंबरची जर्सी घातलेला खेळाडू भारतीय कर्णधारासमोर नाकाजवळ हात हलवताना दिसत आहे. भारतीय खेळाडूच्या अंगाला वास येत असल्याचे त्याला यातून सुचवायचे होते, हे अगदी स्पष्ट दिसते. मात्र, सामन्याच्या रेफरींनी या गंभीर प्रकारावर कोणतीही कारवाई केली नाही.
या प्रकारानंतर भारतीय फुटबॉल चाहते आणि माध्यमांनी तीव्र संताप व्यक्त केला आहे. हा प्रकार अत्यंत भेदभाव करणारा असून, अखिल भारतीय फुटबॉल महासंघाने (AIFF) आशियाई फुटबॉल महासंघाकडे (AFC) याबाबत तातडीने तक्रार करावी, अशी मागणी जोर धरत आहे.
याप्रकरणी चौकशी किंवा कारवाईबाबत अद्याप कोणत्याही फुटबॉल संघटनेकडून अधिकृत निवेदन आलेले नाही.
Palestine No. 19 does a racist gesture towards India U17 captain Gangte. Referee takes no action.
Racism has no place in football. AFC needs to investigate this 🚫 pic.twitter.com/iUNBdLD1oE— Troll Football Media (@TrollFootball2) November 17, 2026
सोशल मीडियावर या घटनेवर जोरदार प्रतिक्रिया उमटत आहेत. एका युझरने जुन्या घटनेची आठवण करून देत AFC कडे कठोर कारवाईची मागणी केली आहे, तर AIFF ने विलंब न लावता अधिकृत तक्रार दाखल करावी असे म्हटले आहे.
दुसऱ्या एका चाहत्याने संताप व्यक्त करत लिहिले की, पॅलेस्टाईनच्या खेळाडूने उघडपणे वर्णद्वेषी कृत्य केले आणि रेफरी फक्त पाहत राहिले. अशा खेळाडूंना फुटबॉलच्या मैदानावर पाय ठेवू द्यावा का, असा थेट सवालही एकाने उपस्थित केला आहे.
फिफा आणि इतर खंडीय संस्थांचे अशा वर्णद्वेषी वर्तनाविरुद्ध कडक नियम आहेत. जर सामन्यादरम्यान असा प्रकार घडला, तर खेळाडू किंवा अधिकारी मनगटाने 'X' अशी खूण करून रेफरींना माहिती देऊ शकतात. यानंतर तीन टप्प्यांची कारवाई सुरू होते.
यात पहिल्यांदा सामना थांबवून वर्णद्वेषाविरुद्ध सार्वजनिक इशारा दिला जातो. तरीही प्रकार सुरूच राहिल्यास, रेफरी सामना थांबवून दोन्ही संघांना ड्रेसिंग रूममध्ये पाठवू शकतात. यानंतरही हे थांबले नाही, तर थेट सामना रद्द करण्याचा अधिकार रेफरींना असतो.
यावरील कारवाई फक्त सामन्यापुरती मर्यादित नसते. दोषी आढळल्यास खेळाडूंना दीर्घकाळासाठी बंदी आणि दंड होऊ शकतो. तर क्लब आणि राष्ट्रीय संघटनांना आर्थिक दंड, स्टेडियम बंदी, गुण कपात किंवा स्पर्धेतून बाद होण्याच्या कारवाईला सामोरे जावे लागू शकते.
तसेच, मैदानावर रेफरींकडून एखादी गोष्ट सुटली तरी ब्रॉडकास्ट फुटेज आणि स्टेडियम रेकॉर्डिंगच्या आधारे शिस्तपालन समिती नंतरही चौकशी करून कारवाई करू शकते.
सध्या मुसळधार पावसामुळे हा सामना १-१ अशा बरोबरीवर असताना थांबवण्यात आला आहे. हृषिकेश चरण मानवती आणि गांगटे यांच्या साहाय्याने कमगौहाओ डौंगेल याने गोल करत भारताला सुरुवातीलाच आघाडी मिळवून दिली होती.
सामन्यात राज सिंग वाहेनगबाम याला धोकादायक टॅकल केल्याबद्दल पॅलेस्टाईनच्या मोहम्मद जामौरला थेट रेड कार्ड मिळाले. त्यामुळे पॅलेस्टाईनचा संघ १० खेळाडूंवर आला. त्यानंतर ३३ व्या मिनिटाला यझान खलिफाने पेनल्टीवर गोल करत पॅलेस्टाईनला बरोबरी साधून दिली.
दोन्ही संघ सहा गुणांसह अजिंक्य राहून या सामन्यात उतरले होते. या गटातील फक्त विजेता संघच उझबेकिस्तानमध्ये होणाऱ्या २०२७ च्या मुख्य स्पर्धेसाठी पात्र ठरणार आहे.