
मुंबई : लिथुआनियाची राजधानी विल्नियसमध्ये गुरुवारी, 11 नोव्हेंबर रोजी एका धक्कादायक घटनेत, मद्यधुंद अवस्थेतील ब्रिटनच्या दोन पर्यटकांनी 15 व्या शतकातील 'श्राइन ऑफ डिव्हाईन मर्सी'बाहेरून येशू ख्रिस्ताचा सोनेरी पुतळा चोरून फोडल्याचा आरोप आहे.
सोशल मीडियावर, विशेषतः एक्स (पूर्वीचे ट्विटर) वर व्हायरल झालेल्या सीसीटीव्ही फुटेजनुसार, एक ब्रिटिश नागरिक येशू ख्रिस्ताचा सोनेरी पुतळा हातात घेऊन उभा असल्याचे दिसत आहे. मात्र, त्याचा तोल गेल्याने पुतळ्याचे हात तुटले आणि तो जमिनीवर पडून त्याचे तुकडे झाले.
डोमिनिकोनू स्ट्रीटवरील चर्चच्या आतल्या अंगणातील लाकडी क्रॉसवरून हा पुतळा काढण्यात आला होता. त्याचा साथीदार जवळच्या बाकावरून हे सर्व रेकॉर्ड करत होता, तेव्हा तो पुतळा जमिनीवर पडून फुटला.
विल्नियसच्या ओल्ड टाऊनच्या मध्यभागी असलेले डोमिनिकोनू स्ट्रीट हे 'श्राइन ऑफ डिव्हाईन मर्सी'साठी प्रसिद्ध आहे. रात्रीच्या वेळी हे दोन पुरुष चर्चच्या अंगणात घुसले आणि त्यांनी चोरी केली. हे अंगण रात्री उशिरापर्यंत उघडे असते.
स्थानिक वृत्तांनुसार, या दोघांचा उच्चार ब्रिटिश असल्याचा अंदाज आहे. ते चर्चच्या अंगणात शिरले आणि एकाने लाकडी क्रॉसवरून येशू ख्रिस्ताचा सोनेरी पुतळा काढला व डोमिनिकोनू स्ट्रीटवर आणला, तर दुसरा साथीदार त्याचे चित्रीकरण करत होता.
श्राइनचे पाद्री फादर एलियास अनाटोलिजस मार्कोस यांनी शेअर केलेल्या सीसीटीव्ही फुटेजमध्ये, एक ब्रिटिश नागरिक येशूचा पुतळा हातात घेऊन 'प्रेझ द लॉर्ड!' असे म्हणताना ऐकू येत आहे. तो कॅमेरासमोर पुतळा उंचावण्याचा प्रयत्न करत असतानाच, पुतळ्याच्या वजनामुळे त्याचे हात तुटले आणि पुतळा जमिनीवर कोसळला.
A man removed a statue of the crucified Jesus from a church in Vilnius and held it up while joking with another man, before smashing it on the street. Both men fled the scene.
A priest has appealed for help identifying the English-speaking suspects. https://t.co/VK97fBWw8v
— Al Jazeera English (@AJEnglish) November 15, 2026
पुतळा फुटल्यानंतर दोन्ही पुरुष हसले आणि येशूचा तुटलेला सोनेरी पुतळा रस्त्यावर टाकून डोमिनिकोनू स्ट्रीटवरून पळून गेले.या संपूर्ण घटनेचा सीसीटीव्ही फुटेज सोशल मीडियावर व्हायरल झाल्यानंतर स्थानिक आणि आंतरराष्ट्रीय स्तरावर या घटनेचा तीव्र निषेध करण्यात आला.
'श्राइन ऑफ डिव्हाईन मर्सी'बाहेर येशू ख्रिस्ताचा पुतळा फोडल्याच्या घटनेनंतर, विल्नियस पोलिसांनी लिथुआनिया प्रजासत्ताकच्या फौजदारी संहितेच्या कलम 284 अंतर्गत सार्वजनिक सुव्यवस्थेच्या उल्लंघनाची चौकशी सुरू केली आहे.
अधिकाऱ्यांनी या घटनेप्रकरणी एका 37 वर्षीय ब्रिटिश नागरिकाला शोधून त्याची चौकशी केली. त्याचे ओळखपत्र जप्त करण्यात आले असून तपासाचा एक भाग म्हणून त्याला देश सोडण्यास मनाई करण्यात आली आहे. 14 नोव्हेंबर रोजी या व्यक्तीची अधिकृतपणे चौकशी करण्यात आली असून त्याने घटनेबाबत स्पष्टीकरण दिले असल्याचे पोलिसांनी सांगितले.
मिळालेल्या माहितीनुसार, या ब्रिटिश नागरिकावर सार्वजनिक आदराच्या ठिकाणाचे विटंबन केल्याचा संशय आहे आणि आता लिथुआनियाच्या फौजदारी संहितेच्या कलम 312(2) अंतर्गत तपास सुरू आहे. जर तो दोषी आढळला, तर कथित गुन्ह्याचे स्वरूप आणि धार्मिक मूर्तीचे झालेले नुकसान पाहता त्याला समाजसेवा, दंड किंवा तीन वर्षांपर्यंतच्या तुरुंगवासाची शिक्षा होऊ शकते.
दरम्यान, फादर एलियास अनाटोलिजस मार्कोस यांनी सांगितले की, चर्च समुदाय या व्यक्तीला क्षमा करण्यास तयार आहे. त्यांनी जाणीवपूर्वक येशू ख्रिस्ताच्या सोनेरी पुतळ्याचे नुकसान केल्याचे त्यांना वाटत नाही. श्राइनने असाच नवीन पुतळा खरेदी करून तो पुन्हा स्थापित करण्याची योजना आखली असल्याचेही त्यांनी सांगितले.
'श्राइन ऑफ डिव्हाईन मर्सी'ने समुदायाच्या वतीने एक निवेदन जारी करून पुतळ्याच्या विनाशाबद्दल दुःख व्यक्त केले आणि याला श्रद्धेच्या पवित्र प्रतीकावरील हल्ला असे वर्णन केले.