Healthy Life: कोका-कोला आणि स्प्राइटची आवड, तरीही १०१ वर्षांच्या आजोबांचा फिटनेस एकदम कडक!
सार
वेळेचं पक्कं नियोजन हेच लू यांच्या उत्तम आरोग्याचं रहस्य आहे. ते संध्याकाळी ५ वाजता जेवतात आणि रात्री ८ वाजता झोपतात. पहाटे ४ वाजता जाग आल्यावरही, ते सलग दोन तास अंथरुणातच व्यायाम करतात आणि मगच उठतात.
निरोगी राहायचं असेल तर फक्त हेल्दी खाणं गरजेचं असतं, असं आपल्याला वाटतं ना? पण चीनमधल्या एका १०१ वर्षांच्या आजोबांनी हा समज खोटा ठरवलाय. त्यांच्या खाण्यापिण्याच्या सवयी सध्या सोशल मीडियावर चांगल्याच चर्चेत आहेत. चीनच्या झेजियांग प्रांतात राहणाऱ्या लू शिझेंग या आजोबांची ही भन्नाट गोष्ट आहे.
लू आजोबांना कुठलेही कडक डाएट किंवा पथ्यपाणी पाळायला अजिबात आवडत नाही. जे आवडतं ते मनसोक्त खायचं आणि आनंदी राहायचं, हा त्यांचा फंडा आहे. कोका-कोला आणि स्प्राइट हे त्यांचे सर्वात आवडते ड्रिंक्स आहेत. विशेषतः थंडगार स्प्राइटमध्ये व्हाईट वाईनचे काही थेंब टाकून प्यायला त्यांना खूप आवडतं.
लू आजोबा आपल्या पेन्शनचा मोठा हिस्सा चांगल्या जेवणावर खर्च करतात. ते एका वेळेला अर्धी वाटी भात आणि एक अख्खी प्लेट खेकडा सहज फस्त करतात. याशिवाय सीफूड, डुकराचे मांस (पोर्क), कलिंगड, पेअर (नाशपाती) आणि मँडरीन संत्री हे पदार्थही त्यांच्या रोजच्या आहारात असतात.
वेळेचं पक्कं नियोजन हे त्यांच्या फिटनेसचं दुसरं मोठं रहस्य आहे. ते संध्याकाळी ५ वाजता जेवतात आणि रात्री ८ वाजता झोपायला जातात. पहाटे ४ वाजता जाग आल्यावरही, ते सलग दोन तास अंथरुणातच व्यायाम करतात आणि मगच उठतात. दुपारी थोडा वेळ झोपण्याचीही त्यांची सवय आहे.
गेल्या वर्षी ते एकदा पडले होते, त्यामुळे घरच्यांनी त्यांना ट्रायसायकल चालवायला बंदी घातली आहे. तरीही, या वयात आपल्याला कोणताही मोठा आजार नसल्याचं लू आजोबा अभिमानानं सांगतात. त्यांना सर्दीसुद्धा क्वचितच होते. त्यांचा रक्तदाब एकदम नॉर्मल आहे आणि तरुणपणातल्या गोष्टीही त्यांना स्पष्ट आठवतात. झेजियांग प्रांतात १०० वर्षांवरील वृद्धांना सरकारकडून जे मासिक पेन्शन मिळतं, तोच त्यांच्या उत्पन्नाचा मुख्य स्रोत आहे.
आजोबांची ही जीवनशैली सध्या सोशल मीडियावर खूप व्हायरल होत आहे. एका युझरने लिहिलंय की, 'चांगले विचार आणि पुरेशी झोप हेच त्यांच्या दीर्घायुष्याचं खरं रहस्य आहे.' तर दुसऱ्या एकाने म्हटलंय, 'काही लोक जन्मतःच असे असतात, त्यांच्या जीवनशैलीचा यात खूप छोटा वाटा असतो.'